«Qazaqmystaǵy» jumysshylar ólimi: Oqıǵa ornyna komıssııa attandy

<p>Jambyl oblysynyń ákimi Erbol Qarashókeev &laquo;Qazaqmys&raquo; korporatsııasyna qarasty &laquo;Jaısan&raquo; kenishinde oryn alǵan jazataıym oqıǵany tekserý barysyn jeke baqylaýyna aldy. Qazir kenish ornyna ákimdikte arnaıy qurylǵan komıssııa attanyp ketti, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Oblys ákimdigi Eńbek ınspektsııasy basqarmasynyń basshysy – bas memlekettik eńbek ınspektory Jarylqasyn Aıtaqov bastaǵan komıssııa quramynda QR TJM ónerkásiptik qaýipsizdik departamentiniń, «Qazaqmys korporatsııasy» JShS-nyń ókilderi bar.

Qazirgi tańda Jambyl oblysy Shý aýdanynyń ákimi Baqytjan Jánibekov oqıǵa ornynda júr.

Eske salaıyq, búgin «Qazaqmys» kompanııasynyń Jambyl oblysyndaǵy «Jaısan» kenishinde Taý-ken jumystaryn júrgizý kezinde Ǵ.Omarov atyndaǵy shahta prohodkalaý trestiniń 1981 jáne 2002 jyly týǵan jumysshylary aýyr jaraqat alyp, kóz jumdy.

Aıta ketsek, bul «Qazaqmysqa» tıesili kenishterde sońǵy ýaqytta oryn alǵan alǵashqy oqıǵa emes. Atap aıtqanda, osydan bir apta buryn «Qazaqmys» kompanııasynyń Jezqazǵan baıytý fabrıkasynda mashınıst mert boldy. Al 6 qarashada Shyǵys Jezqazǵan kenishiniń №57 shahtasynda jumysshy qaza taýyp, «Jylandy» kenishinde 6 qyzmetker jaraqat alǵany habarlanǵan edi.