Qazaqmys kompanııasy Balqashtyń ekojúıesin saqtaýǵa 5 mln dollar bóledi

<p>ASTANA. KAZINFORM &ndash; Memleket basshysy Qasym-Jomart Toqaev birer kún buryn One Water sammıtine qatysý úshin Saýd Arabııasyna jumys saparymen bardy. Sammıt barysynda Qazaqstandaǵy biregeı Balqash kóli nazarda boldy. Osy oraıda Balqash kóliniń ekojúıesi men oǵan irgeles sýly-batpaqty jerlerdi qorǵaý jáne saqtaý maqsatynda &laquo;Qazaqmys&raquo; jeke kompanııasy 5 mln AQSh dollary kóleminde qarjy bóletini belgili boldy.</p>

Aıta keteıik, One Water Summit 2024 halyqaralyq forýmy Qazaqstan men Frantsııanyń tóraǵalyǵymen, Saýd Arabııasy jáne Dúnıejúzilik bank tobynyń qoldaýymen ótti.

Memleket basshysy Qasym-Jomart Toqaev atalǵan sammıttiń ashylý saltanatynda sóz sóıledi. 

— Barsha adamzat, ásirese shalǵaıda tirshilik etip jatqan turǵyndar men halyqtardyń osal toby sanıtarlyq talaptarǵa saı keletin taza aýyzsýǵa qol jetkizýge tıis. Bul — olardyń quqy. Klımat pen sý ınfraqurylymyna arnalǵan maqsatty ınvestıtsııalar sý kózimen qamtamasyz etip, ornyqty ósimge septigin tıgizedi. Osy arqyly tutas óńirler órkendeıdi. Qazaqstannyń taza aýyzsýǵa jappaı qol jetkizýdi kózdeıtin Freshwater Challenge jahandyq bastamasyna qosylýy elimizdiń osy maqsatqa jetýge beıil ekenin rastaıdy, — dedi Prezıdent.

Memleket basshysy elimizdiń Dúnıejúzilik bankpen strategııalyq seriktestiginiń mánin erekshe atap ótti.

Prezıdenttiń aıtýynsha, búginde qarjy ınstıtýtymen birlese sý resýrstary, kólik jáne bilim berý salalarynda jalpy quny 3,5 mıllıard dollar bolatyn bes iri joba júzege asyrylyp jatyr.

Sondaı-aq One Water sammıtinde QR Prezıdentiniń halyqaralyq ekologııalyq yntymaqtastyq jónindegi arnaıy ókili Zúlfııa Súleımenova elimizdiń sý qoryn ekologııalyq qorǵaý máselesin qozǵap, bes ulttyq bastamany kóterdi. Sonyń biri otandyq «Qazaqmys» kompanııasynyń Balqash kólin qorǵaýǵa arnalǵan jobasy.

— Ekojúıesin qorǵaýdy nazarǵa alatyn bizdiń ishki sý qoımalarymyz bar, sonyń biri — Balqash kóli. Kóldiń biregeıligi — jartylaı tuzdy sý, jartylaı tuşy sýdan turady. Onyń ońtústiginde Ramsar konventsııasynyń sýly-batpaqty aýmaǵy ornalasqan. Sizdiń ruqsatyńyzben Qazaqstannyń jetekshi jeke kompanııasy «Qazaqmys» korporatsııasy Balqash kóliniń ekojúıesin saqtaýǵa baǵyttalǵan jobalarǵa 5 mıllıon AQSh dollaryn bóletinin jarııalaǵym keledi. Jeke sektor ókilderi sý ekojúıelerin saqtaýda belsendilik tanytyp otyr, — dedi Zúlfııa Súleımenova.

Eske sala ketsek, bıyl mamyrda «Balqash-2024» halyqaralyq sý-klımat forýmy ótti. Forýmǵa qatysýshylar Balqash kóliniń ekologııalyq degradatsııasynyń aldyn alý máselelerin kóterdi. Sol sııaqty Balqash kóliniń jaǵdaıyna alańdaýly qoǵamdastyq músheleri birqatar ınnovatsııalyq sheshimder usyndy.

«Qazaqmys» kompanııasy ekologııalyq saıasat jáne ESG qaǵıdattaryn ustana otyryp, forýmda belgilengen is-sharalarǵa belsendi atsalysyp, Balqash kólin qorǵaý jáne saqtaý baǵdarlamasyn ázirleýge úles qosatynyn bildirgen edi.