Kazakh Tourism: Qytaıdan kelgen týrıster orta eseppen 1 myń dollar jumsaıdy

<p>ALMATY. KAZINFORM &mdash; Almatyda Qytaıdaǵy Qazaqstan týrızm jylynyń jabylýyna arnalǵan halyqaralyq forým uıymdastyryldy. Іs-shara aıasynda &laquo;Kazakh Tourism&raquo; UK&raquo; AQ Basqarma Tóraǵasy Qaırat Sádýaqasov eki el arasyndaǵy jetistikterge toqtaldy.</p>

— 2017 jyldyń ózinde biz Qytaıdan 300 myńǵa jýyq týrıst tartqymyz keletin. Biraq sol kezde bul josparymyz oryndalǵan joq. Odan biz mańyzdy sheshimder shyǵardyq. Bıyl biz Qytaıdaǵy áriptesterimizben jumys isteýdiń ebin taptyq dep oılaımyn. Jyl ishinde Qytaıdyń 50-den astam jańa týrıstik kompanııalarymen seriktestik kelisimge keldik, — dedi ol.

Sondaı-aq, Qaırat Sádýaqasov Qytaıdan Qazaqstanǵa keletin saıahatshylar sany jarty mıllıonnan asqanyn atap ótti.

Foto: Aleksandr Pavskıı/Kazinform

 

— Kóp jyl boıy Qazaqstannan Qytaıǵa baratyn saıahatshylar sany, bizge keletin týrısterge qaraǵanda kóbirek bolatyn. Bıyl 400 myńdaı jerlesimiz Qytaıǵa barsa, kórshi memleketten Qazaqstanǵa osy jyldyń 10 aıynda kelgen týrıster sany 550 myńǵa jetti. Bizdegi derekke súıensek, qytaılyq týrıst orta eseppen 1 myń dollar jumsaıdy, — dedi «Kazakh Tourism» Tóraǵasy.

Al Qazaqstan men Ortalyq Azııadaǵy Mastercard bas dırektory Sanjar Jamalov elimizge negizinen Qytaıdyń qaı óńirlerinen týrıster keletinin kórsetti. Onyń aıtýynsha, qytaılyq týrısterdiń 31%-y Gýanchjoýdan, 20%-y Beıjińnen, 12%-y Úrimshiden, 12%-y Shanhaıdan, 8%-y Hanchjoýdan keledi. Sondaı-aq, kórshiles elden kelgen týrıster orta eseppen Almatyda 7-9 kún ótkizedi.

Eske salaıyq, buǵan deıin Almatyda Qytaıdaǵy Qazaqstan týrızm jyly jabylǵanyn jazǵanbyz.