Kazakh Invest basqarýshy dırektory Azamat Qojanov: Jasyl sýtegi jobasy – bolashaqqa ınvestıtsııa

ASTANA. QazAqparat – Ótken jyly «jasyl» sýtegin óndirý týraly ınvestıtsııalyq jobaǵa qol qoıylǵan edi. «Kazakh Invest» Ulttyq kompanııasy» AQ basqarýshy dırektory Azamat Qojanovtyń sózinshe, atalǵan joba – bolashaqqa salynǵan ınvestıtsııa. Ol bul týraly QazAqparat tilishisine bergen suhbatynda aıtty.

«Joba – bolashaqqa salynǵan ınvestıtsııa, sonysymen erekshe. «Jasyl» sýteginiń naryǵy 10 jyldan keıin 100 mıllıard dollardan asady. Al, naryqtaǵy negizgi ónim jetkizýshiler qatarynda qalǵymyz kelse, mundaı jobalarmen qazir aınalysý kerek», - dedi spıker.

Qazaqstan 2022 jyly Shvetsııa men Germanııanyń «Svevind» birlesken kompanııasymen birge «Jasyl sýtegi» jobasyna qol qoıdy. Alaıda, jobany júzege asyrýdy bastamas buryn, zertteýler men saraptama jasap, kadr daıyndaýdy qolǵa alǵan jón.

«Munyń uzaq merzimdi joba ekenin túsiný kerek. Bul joba eki jaq úshin de tıimdi. Onyń eń basty artyqshylyǵy – aýqymdy joba bolǵandyqtan, sonyń esebinen shyǵyndardy azaıtýǵa múmkindik beredi. Bul ónimder bizge básekege qabiletti bolýymyzǵa jaǵdaı jasaıdy, olardyń ózindik quny tómen bolady. Biz sheteldik ınvestıtsııa arqyly óz quzyretimizdi arttyryp jatyrmyz. Demek, ınvestorlar esebinen biz memlekettik bıýdjetten qarjy bólmeı, iri kapıtaldy qajet etetin jobalardy eksporttaýdy jáne júzege asyrýdy zertteımiz. Búginde osy kelisimge sáıkes, Qazaqstan 2030 jyldan bastap 2 mıllıon tonna «jasyl» sýtegin óndiredi, bul – EO-nyń osy ónimge degen qajettiliginiń besten biri. Jobadaǵy basty másele – tasymaldaý. Bul ońaı suraq emes, biraq tehnologııanyń tıimdiligi artyp keledi. Qazirgi ınvestıtsııalar aıasynda ǵana biz bul ınvestıtsııalyq bastamanyń Qazaqstan Respýblıkasynda qanshalyqty tıimdi ekenin túsine alamyz», - dep túıindedi sózin Azamat Qojanov.

Eske salaıyq, 2022 jyly Qazaqstan 28,5 mıllıard dollar tikeleı sheteldik ınvestıtsııa tartqan edi.