Qazaqfılm «Altyn adam» anımatorlarynyń jalaqysyn tólep beredi

<p>ALMATY. KAZINFORM — Ulttyq kınony qoldaý memlekettik ortalyǵy Sh. Aımanov atyndaǵy «Qazaqfılm» ulttyq kınostýdııasy anımatorlarynyń «Altyn adam» anımatsııalyq fılmine qatysty narazylyǵyna resmı jaýap berdi.</p>

Ortalyqtyń málimetinshe, atalǵan anımatsııalyq joba qazaq úshin qadirli «Altyn adamnyń» rýhanı mańyzyn ashyp kórsetýdi maqsat etken. 

Joba 2020 jyly usynylyp, bastalǵan. Jalpy quny — 378 mln teńge. Kelisimshart boıynsha kınojoba 2021 jyly aıaqtalýy tıis bolatyn.

Biraq oryndaýshy mindettemelerdiń údesinen shyqpaı, jumysty tolyq aıaqtamady jáne fılmdi belgilengen ýaqytta ótkizbegen.

Osylaısha jobany júzege asyrý merzimi josparlanǵan 2020-2021 emes, 2020-2023 jyldar aralyǵynda sozyldy. Merzimi uzarǵannan keıin joba 2023 jyly naqty ári tolyqqandy aıaqtalýy tıis bolatyn.

«Alaıda, 2023 jyldyń sońynda da oryndaýshy saraptama keńesi engizgen 126 eskertýdi elemegeni anyqtaldy. Osyǵan baılanysty „Ulttyq kınony qoldaý memlekettik ortalyǵy“ qalyptasqan jaǵdaıdy nazarǵa ala otyryp, jobanyń úsh jylǵa deıin sozbalańǵa salynýy týrasynda bir toqtamǵa kelýi tıis boldy. Oryndaýshyǵa atqarylǵan jumys úshin jalpy quny 294 mln teńge tólendi. Alaıda qoldanystaǵy zańnamaǵa sáıkes, aıaqtalmaǵan jobalarǵa memleket qarjy bólýge qaýqarsyz ekenin aıta ketken jón. Osyǵan baılanysty qalǵan 84 mıllıon teńge respýblıkalyq bıýdjetke qaıtaryldy. Sondaı-aq, 2023 jyldyń sońynda anımatsııalyq joba tapsyrylmaǵandyqtan „Ulttyq kınony qoldaý memlekettik ortalyǵy“ sotqa shaǵym túsirýge májbúr boldy» deıdi ortalyqtan.

Ulttyq kınony qoldaý memlekettik ortalyǵynyń basqarma tóraǵasy Q.Jumaǵalı áleýmettik jelidegi postynda bul máselege pikir bildirgen bolatyn.

«Qazaqfılm» tizginindegi Azamat Satybaldymen bir aı buryn atqarýshylyq is júrgizý sheńberinde medıatıvtik kelisim jasaýǵa ýaǵdalastyq» dedi ol jazbasynda.

Endigi kezekte «Qazaqfılmniń» jobaǵa jaýapty ujymy fılmdi ózara kelisim arqyly aıaqtap, «Altyn adam» anımatsııalyq fılmin prokatqa shyǵarady.

Odan túsken taza tabystyń 20%-y kıno ortalyǵyna aýdarylsa, qalǵan 80%-y «Qazaqfılmniń» úlesinde qalady.

Osylaısha «Qazaqfılm» ulttyq kınostýdııasy atalǵan jobanyń túsirilim toby aldyndaǵy bereshegin óteıdi.

«Aıta ketý qajet, memlekettik qarjylandyrýdy usynatyn biryńǵaı operator retindegi UKQMO qyzmeti ulttyq kınematografııany qarjylaı qoldaýǵa jáne UKQMO jarǵysyna sáıkes, ónimderdiń sapaly shyǵýy men bólingen qarjynyń maqsatty jumsalýyn qadaǵalaýǵa qurylǵan. Osyǵan baılanysty barlyq saýaldar quqyqtyq negizde jáne Qazaqstan zańnamasyna saı sheshimin tabady» deıdi mekemeden.

Eske sala keteıik, «Altyn adam» týyndysynyń anımatorlary jeti aıdan beri jalaqy almaǵanyn aıtyp, Qazaqfılm ǵımaratynyń aldynda narazylyqqa shyqqan bolatyn.