«Qazaqfılmdi» jekeshelendirý múmkin be

ASTANA. QazAqparat - Parlament Májilisiniń jalpy otyrysynda QR Mádenıet jəne sport mınıstri Arystanbek Muhamedıuly «Qazaqfılm» kınostýdııasyn jekeshelendirý máselesine qatysty túsinik berdi, dep habarlaıdy QazAqparat.

«Bul máselege Mádenıet jáne sport mınıstrliginen bólek, Ulttyq ekonomıka jáne Qarjy mınıstrlikteriniń de qatysy bar. Sáıkesinshe, vedomstvolardyń ózderinde tıisti josparlary eskerilgen. Olar memleketke túsip turǵan júktemeni azaıtyp, osylardy jeke qolǵa berýge nıetti. Bizdiń maqsat - ulttyq qundylyqtardy saqtap qalý. Olar bul máselelerge ekonomıkalyq turǵydan qarasa, biz ulttyq múdde ustanymy aıasynda kózqarasymyzdy bildirýdemiz», - dep toqtaldy A. Muhamedıuly.

Mınıstr «Qazaqfılmdi» jekeshelendirý máselesi nelikten únemi keıinge shegerilgenin, sondaı-aq ne sebepti naqty sheshim qabyldanbaǵanyn túsindirdi.

«Kınematografııa týraly» jańa zań jobasynyń ázirlenýine baılanysty biz bul máseleni keıinge shegerip keldik. Osy zań qabyldanǵannan keıin, «Qazaqfılmdi» jeke qolǵa berý bastamasynyń máni bolmaıdy», - dedi vedomstvo basshysy.

Onyń sózine qaraǵanda, kınostýdııany Arnaıy ekonomıkalyq aımaq aýmaǵy quramyna engizý josparlanyp otyr. Osydan keıin «Qazaqfılm» jekeshelendirýge jatpaıdy.

Atap aıtqanda, búgin Parlament Májilisiniń jalpy otyrysynda «Kınematografııa týraly» zań jobasy birinshi oqylymda maquldandy.

Esterińizge sala keteıik, bıyl qańtar aıynda Parlament Májilisiniń depýtattary «Qazaqfılmdi» jekeshelendirýge qarsy shyqqan bolatyn.

Munymen qosa, QR Mádenıet jáne sport mınıstri Arystanbek Muhamedıuly Sháken Aımanov atyndaǵy «Qazaqfılm» kınostýdııasynyń memleket menshiginde qalǵanyn jaqtaıtyndyǵyn atap ótken edi.