«Qazaqfılmdi» jekeshelendiretin nysandar tiziminen shyǵarý máselesi qaralyp jatyr

ASTANA. QazAqparat - «Qazaqfılmdi» jekeshelendiretin nysandar tiziminen shyǵarý máselesi talqylaý kezeńinde. Bul týraly Ortalyq kommýnıkatsııalar qyzmetindegi baspasóz máslıhatynda QR Qarjy mınıstrligi Memlekettik múlik jáne jekeshelendirý komıteti tóraǵasynyń mindetin atqarýshy Ǵalymjan Ybyraıymov málim etti, dep habarlaıdy QazAqparat.

«Qazaqfılmge» toqtalsaq, ony jekeshelendiriletin uıymdardyń tiziminen shyǵarý máselesi qaralyp jatyr. ıAǵnı bul taqyryp talqylaý kezeńinde. Eger de meniń jeke pikirimdi aıtatyn bolsam, «Qazaqfılmdi» jekeshelendiriletin nysandar tiziminen alyp tastaý usynysymen kelisemin», - dedi Ǵalymjan Ybyraıymov.

Esterińizge sala keteıik, bıyl qańtar aıynda Parlament Májilisiniń depýtattary «Qazaqfılmdi» jekeshelendirýge qarsy shyqqan bolatyn.

Májilis depýtattary sonymen birge bir qaýiptiń baryn alǵa tartty.

«Stýdııany satyp alǵan qojaıyn óziniń ıdeologııasyn júrgizetin bolady. Ol bizdiń jas órken talanttarymyzdy óz múddesine májbúrleıdi. Osy jaǵdaıdy eskere otyryp, «Qazaqfılm» kınostýdııasyn jekeshelendirý tiziminen shyǵarý múmkindigin qarastyrýdy suraımyz», - dedi dedi Qýanysh Sultanov.

Munymen qosa, QR Mádenıet jáne sport mınıstri Arystanbek Muhamedıuly Sháken Aımanov atyndaǵy «Qazaqfılm» kınostýdııasynyń memleket menshiginde qalǵanyn jaqtaıtyndyǵyn atap ótken edi.

«Ol jekeshelendiriletin nysandardyń tizimine 4-5 jyl buryn qosylǵan edi. «Qazaqfılmniń» tek 49 paıyzy ǵana satylady, al qalǵan 51 paıyzy qalaı desek te memleket menshiginde bolmaq.  Desek te, biz «Qazaqfılmniń» memleket menshiginde qalýy úshin tyrysamyz. Satyp alýshy bolmasa, qýanamyn», - dedi mınıstr.