«Qazaqfılm» «Óliara» tarıhı fılminiń túsirilimin aıaqtady

NUR-SULTAN. QazAqparat – Almaty oblysy Kerbulaq aýdany Balǵaly stantsııasynyń mańynda vengrııalyq rejısser Tamash Tottyń «Óliara» fılminiń sońǵy túsirilimderi ótti. Bul týraly «Qazaqfılm» AQ-nyń baspasóz qyzmetinen málim etti, dep habarlaıdy QazAqparat.

Tarıhı kınotýyndyny QR Mádenıet jáne sport mınıstrliginiń tapsyrysy boıynsha Ulttyq kınony qoldaý memlekettik ortalyǵynyń qoldaýymen Sh.Aımanov atyndaǵy «Qazaqfılm» kınostýdııasy túsirdi.

«Búgin biz basty keıipkerdiń Qazaqstanǵa kelgen sátin túsirdik. Bul sahna fılmniń basynda kórsetiledi. Sol úshin eski parovoz ben vagondar «Qazaqstan temir joly» kompanııasy arqasynda osy jerge jetkizildi. Túsirý jumystaryna kún saıyn 50-den astam adam (massovka) qatysty», - dedi fılmniń prodıýseri Oljabaı Musabekov

Rejısser Tamash Tot kartına stsenarııin ózgertýge týra kelgeni týraly aıtyp ótti.

«Basynda fılmdi qys mezgilinde túsiremiz dep josparlaǵan bolatynbyz. Ýaqyttyń tyǵyzdyǵynan stsenarııdi sál ózgertip, qazan aıynda túsirilimderdi bastap ketýge májbúr boldyq. Negizgi túsirilmder Almaty oblysy Kegen aýdany Jalańash aýylynyń mańynda ótti. Tájirıbeli jáne kásibı komandamyzdyń arqasynda túsirilimderdi ýaqytyly aıaqtadyq», - dedi rejısser Tamash Tot.

Sonymen qatar rejısser basty rólge Vengrııanyń teatr jáne kıno akteri Peter Barnaı (Péter Bárnai) shaqyrylǵanyn málim etti. Odan bólek, fılmge Aldabek Shalbaev, Erjan Nurymbet syndy basqa da otandyq akterler túsken.

-«Fılmge túsken akterlerimiz óte myqty. Bul jobaǵa talantty akterler jınaldy. Mysaly, Vengrııadan jas akter Peter Barnaıdy arnaıy shaqyrttyq. Osy ýaqyt aralyǵynda ol úlken jumys atqardy. Bul oǵan úlken mektep boldy. Orys jáne qazaq tilderinde sóılemese de, dıalogtardy jatqa aıtyp, túsirilimder kezinde esh qınalmady. Qazaqstandyq akterler oǵan úlken kómek kórsetti», - dedi rejısser.

Sondaı-aq «Óliara» fılminiń túsirý toby osy kartınanyń túsirilimderine qatysqan Nomad Stunts kaskaderler tobyna alǵysyn bildirdi.

Prodıýserdiń aıtýyna qaraǵanda, barlyǵy 35 Tb materıal túsirilgen. Fılmniń montajdaý jumystary Býdapesht qalasyndaǵy belgili FOCUSFOX kompanııasynda júrgiziledi. Keıin «Qazaqfılm» kınostýdııasynda týyndynyń orys tilindegi nusqasy daıyndalady.

«Óliara» tarıhı týyndynyń stsenarıı avtory – Nurlan Sanjar, qoıýshy rejısser – Tamash Tot, qoıýshy operator – Alekseı Kırıýhın, qoıýshy sýretshi – Rýstam Odınaev, grım boıynsha sýretshi – Lıdııa Ordynskaıa, prodıýseri – Oljabaı Musabekov