«Qazaqfılm» halyqtyń usynysy boıynsha fılm túsiredi

ALMATY. QazAqparat – «Qazaqfılm» kınostýdııasy halyqtyń usynysy boıynsha fılm túsire bastaıdy. Bul týraly Sh.Aımanov atyndaǵy «Qazaqfılm» AQ-nyń prezıdenti Azamat Satybaldy aıtty, dep habarlaıdy QazAqparat tilshisi.

Azamat Satybaldy áleýmettik jelide «Qazaqfılm» kınostýdııasy endi kórermenmen tikeleı jumys isteıtinin aıtty.

«Qymbatty kórermen, biz endi sizderge unaıtyn, sizderdiń kóńilderińizden shyǵatyn kınolardy túsirýdi bastaımyz. Sondyqtan sizderge usynys jasaǵym keledi. Bolashaqta Qazaqfılmnen sizder qandaı janrdaǵy kınony kórigilerińiz keledi? Komedııadan basqa usynystaryńyz bolsa nemese sizderge qandaı taqyryp unaıdy, mysaly, drama, melodrama, aýyl nemese qala taqyryby ma? Jalpy qandaı baǵytta bolashaqta Qazaqfılmnen kıno kórgilerińiz keledi, sol týraly bizge pikir qaldyryp, jazsańyzdar. Biz sol boıynsha kelesi jyldan bastap jańa kınolardy túsiretin bolamyz. Endeshe men sizderden usynys kútemin», - dedi Azamat Satypaldy.

Eske salaıyq, Azamat Satybaldy jaqynda Sh.Aımanov atyndaǵy «Qazaqfılm» AQ-nyń prezıdenti bolyp taǵaıyndalǵan bolatyn.