«Qazaqavtojol» mamandary júrgizýshilerge eskertý jasady

NUR-SULTAN. QazAqparat – Jol salasynyń mamandary úsh táýlikte qar qursaýynan 2400-den astam kólikti shyǵardy, dep habarlaıdy QR Indýstrııa jáne ınfraqurylymdyq damý mınıstrliginiń baspasóz qyzmeti.

Baspasóz qyzmetiniń málimetterine qaraǵanda, aýa raıynyń qolaısyz jaǵdaıy Qazaqstannyń birqatar óńirinde saqtalyp otyr. Jol salasynyń qyzmetteri respýblıkalyq mańyzy bar avtomobıl joldaryn qardan tazartý, kólikterdi súıemeldeý jumystaryn táýlik boıy júrgizýde.

Osylaısha sońǵy úsh táýlik ishinde respýblıka aýmaǵynda «Qazaqavtojol» JShS kúshimen 2400-den astam kólik qar qursaýynan shyǵaryldy. Aýa raıynyń qolaısyzdyǵy, jeldiń kúsheıýi men joldaǵy jaǵdaıdyń nashar kórinýine baılanysty avtomobıl joldarynyń 40 ýchaskesi qozǵalys úshin búgingi tańda jabyq. Joldy qardan tazartý, kólikterdi tartyp shyǵarý jáne adamdardy qutqarý sharalary belsendi túrde júrgizilýde. Qazirgi tańda elimizdiń bar aýmaǵynda 671 tehnıka jumys istep jatyr.

Respýblıkalyq mańyzy bar avtomobıl joldarynyń jabylýy týraly ózekti aqparat áleýmettik jelilerdegi QR Indýstrııa jáne ınfraqurylymdyq damý mınıstrligi, QR IIDM Avtomobıl joldary komıteti men ««QazAvtoJol» UK» AQ resmı paraqshalarynda jarııalanady.

Tótenshe jaǵdaı týyndasa, júrgizýshiler qysqa 1403 nómirine habarlasa alady.

Jol qyzmetteri avtoáýesqoılardy aýa raıynyń qolaısyz jaǵdaıynda alys saparǵa shyǵýdan bas tartýǵa shaqyrady. Joldaǵy jaǵdaıdyń nashar kórinip, kóktaıǵaq bolǵan kezde júrgizýshilerge jyldamdyqty barynsha tómendetýge, kólikter arasyndaǵy araqashyqtyqty saqtaýǵa jáne basqa kólikterdi ozý kezinde barynsha abaı bolýǵa keńes beriledi.