Qazaq jýrnalıstıkasynyń tarıhyna qysqasha sholý

NUR-SULTAN. QazAqparat - Kásibı qazaq jýrnalıstıkasy HІH ǵasyrdyń 2-shi jartysynan – 1870 jyly «Túrkistan ýalaıaty gazeti» jaryq kórgen kúnnen bastalady. Áýelde osy dataǵa oraı baıyrǵy áriptesterimiz Jýrnalıster kúnin atap ótetin. Ol jáne beıresmı mereke edi. Keıin Qazaq KSR-niń «Baspasóz jáne basqa buqaralyq aqparat quraldary týraly» zańy qabyldanǵan kúnge oraı 28 maýsym Baılanys jáne aqparat qyzmetkerleri kúni (bertinde qoıylǵan ataý) dep belgilendi, dep jazady Ádebıet portaly.

Bıyl «QazAqparat» halyqaralyq aqparat agenttiginiń qurylǵanyna 100 jyl.

- 1920 jyl – agenttik «ROSTA»-nyń Orynbor-Torǵaı bólimshesi negizinde quryldy.

- 1925 jyl – agenttik ataýy QazROST bolyp ózgerdi.

- 1937 jyl – QazTAG degen atpen Qazaq KSR Mınıstrler Keńesiniń qaraýyna berildi.

- 1997 jyl – «Qazaq aqparat agenttigi» respýblıkalyq qazynalyq kásiporny bolyp ózgertildi.

- 2002 jyl – QazAAG negizinde «Qazaq aqparat agenttigi» Ulttyq kompanııasy quryldy.

- 2008 jyl – «QazAqparat» UK» AQ «Arna Medıa» Ulttyq aqparattyq holdıngi» aktsıonerlik qoǵamynyń quramyna kirdi.

- 2013 jyly «QazAqparat» halyqaralyq aqparat agenttigi bolyp quryldy.

- 2020 jyl - «QazAqparat» HAA« JShS men «Qazkontent« AQ ujymy qosylyp, «QazAqparat» halyqaralyq aqparat agenttigi bolyp jasaqtaldy.

Qazaq ASSR Halyq komısarlary Keńesi 1921 jyldyń 29-shy qyrkúıeginde respýblıkalyq radıohabarlaryn taratýdy qurý jóninde sheshim qabyldady. Qazan aıynan bastap Qazaqstannyń sol kezdegi astanasy – Orynbor qalasynan respýblıkaǵa habar taratyla bastady. Búginde Qazaq radıosynyń «Altyn qorda» 1948 jyldan beri saqtalǵan 100 000-nan asa fonogramma bar. Onyń 300-den astamy notalyq qoljazba.

Sýrette: dıktor Muqaǵalı Maqataev radıodaǵy áriptesterimen

Qazaq fotojýrnalıstıkasynyń shejiresi 1930 jyldardan bastalady. Bul tarapta ulttyń uly tulǵalary men ót­ken kezeń kó­rinisterin tarıhta qal­dyrǵan Rys­qalı Dúısen­ǵalıev, Petr Redko, Bek­muhanbet Tilekmetov, Júsipbek Paıyzov, Qaırat Mustafın, Nurǵoja Jubanov, Sıez Básibekov, Saılaý Pernebaev, Denderbaı Egizov, Alashybaı Esmaǵanbetov, Nurmanbet Qızatuly, Rahymbaı Hanaly syndy ardagerlermen maqtanar edik.

Sýrette: alǵashqy fototilshilerdiń biri - Rysqalı Dúısenǵalıev

1958 jyly 8-naýryzda – Qazaq televızııasy dúnıege keldi. Dál osy kúni alǵash ret Almatydan tikeleı habar taratyldy. Onyń tuńǵysh dıktory – Lázıza Aımashova.

Sýrette: Qazaq televızııasynyń alǵashqy dıktorlary

1959 jyly Qazaqstan baspasóz quraldary ókilderiniń shyǵarmashylyq uıymy – Qazaqstan jýrnalıster odaǵy quryldy.

Sýrette: jýrnalıstik tósbelgi

Qazaq baspasózi tarıhynda áldeneshe býyndy tárbıelep ósirgen «redaktorlardyń redaktory» atanǵan tulǵalar jeterlik. Búginde aǵa býyn jýrnalıster «Sheraǵańnyń shekpeninen shyqqanyn», «Temkeńniń (Temirbek Qojakeev) «tepkisin» kórgenderin» maqtanyshpen eske alady.

Sýrette: «Egemen Qazaqstan» gazetiniń ujymy.

Qazaqstandyq BAQ ókilderine beriletin syılyqtar men baıqaýlar sany da jyl sanap artyp keledi. Atap aıtqanda, Qazaqstan Jýrnalıster odaǵynyń syılyǵy, «Samǵaý», «Úrker» Ulttyq premııasy, jýrnalıster arasyndaǵy «Nur Suńqar» dástúrli baıqaýy, «Tumar» Ulttyq televızııalyq báıgesi jáne t.b. Sondaı-aq, bıyldan bastap QR Aqparat jáne qoǵamdyq damý mınıstrliginiń bastamasymen tanymal telejýrnalıst Beısen Quranbek atyndaǵy «Jiger» syılyǵy taǵaıyndaldy.

Sýrette: Beısen Quranbek atyndaǵy syılyqtyń músinshesi

Bastapqy sýret: 1956 jyldardan «Sotsıalıstik Qazaqstan» gazetinde fotograf bolǵan Bekmuhambet Tilekmetovtiń eńbegi.