Qazaq jeriniń bútindigin saqtaýda Shaqshaq Jánibektiń eńbegi eren - Serik Turǵynbekuly
On segizinshi ǵasyrdaǵy qazaq tarıhy qolbasshy, memlekettik qaıratker, batyr Shaqshaq Jánibeksiz aıtylmaıdy. Batyr týraly tarıhı derekter Qazaqstanda ǵana emes, Reseıdiń Máskeý, Sankt-Peterbýrg, Orynbor jáne Omby qalalaryndaǵy arhıvterde saqtalǵan. Qazaq jeriniń bútindigin saqtaýda Jánibek Qoshqarulynyń eńbegi óz aldyna bólek áńgime.
«Keshe men búgindi baılanystyratyn, ǵasyr úrdisin jalǵaıtyn, bútin bir ulttyń altyn arqaýyna aınalyp, el tutastyǵyna qyzmet etetin qasterli kisiler bolady. Solardyń soıy da soqtalysy - Shaqshaq Jánibek. Tarhannyń rýhyna jasalyp jatqan Tobyl-Torǵaı torabyndaǵy myna bastama bizdiń qazaq tarıhyna degen sheksiz qurmetimizdiń dáleli. Batyr, mámileger Jánibek qaıtadan atqa qonyp, máńgilik tuǵyryna ornyqty. Bul - halyqtyń qudiretin, eldiń eńsesin kóteretin eren sharýa. Búgingi elimiz jumyla birigip jatqan «Rýhanı jańǵyrýdyń» uly kórinisi. «Týǵan jerge týyń tik» dep qadap aıtqan edi Elbasy halyqqa joldaǵan baǵdarlamalyq maqalasynda. Eskertkish turǵyzý bastamashyl toptardyń erikti túrdegi isine aınalyp barady. Ótken jyly jurtshylyqtan jınalǵan qarjynyń arqasynda qazaqtyń has batyry Qobylandyǵa Qostanaı qalasynda eskertkish ornatyldy, endi, mine Shaqshaq Jánibek tarhan rýhy týǵan jer kindiginen bastaý alyp, baıtaq dala tósinde oryn tepti», - dedi aqyn, halyqaralyq «Alash» syılyǵynyń ıegeri Serik Turǵynbekuly.
Shaqshaq Jánibek týraly qazaqtyń aqyn-jazýshylary qalam tartpaı qalǵan joq. Árqaısysy árqıly pikirler sabaqtaǵanymen, túptep kelgende, barshasy Jánibek tarhannyń taǵdyr-talaıyn tereńirek zerdeleýge tyrysty. Osy oraıda aqyn Serik Turǵynbekuly Shaqshaq Jánibek urpaqtaryna el alǵysy erekshe ekenin jetkizdi.
«1993 jyly Torǵaı tósinde Jánibek tarhannyń 300 jyldyǵyna arnaıy as berilip, dúrkiregen toı ótken edi. Sol bir halyq esinde qalǵan ıgilikti iske, sol kezdegi aýdan ákimi - Jaqan Qosabaev, sol kezdegi Ulttyq banktiń tuńǵysh tóraǵasy Ǵalym Baınazarov, sondaı-aq, elimizdiń alǵashqy metsenattary Erbolat Tólegenov, Jantemir Hamzın syndy azamattar zor úles qosyp, uıymdastyrýshylyq qabiletin tanytqan edi. Sol ıgilikti is Jánibek babanyń urpaqtarynyń kómegimen taǵy da jalǵasyn tapty. Іrgeli iske uıytqy bolǵan batyr urpaqtary - Kenjeǵalı Saǵadıevke, Saılaýbek Eşanovqa, Tarǵyn Ábenovke, Saǵyndyq Dosmaǵambetovke, Rahym Jumaqulovqa, Sultanǵalı Ospanovqa, Ibrash Estaevqa, Jantemir Hamzınderge alǵys aıtamyn», - dedi aqyn.