Qazaq ulttyq ýnıversıtetinde Sherhan Murtaza atyndaǵy aýdıtorııa ashyldy

ALMATY. QazAqparat - Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetinde Qazaqstannyń halyq jazýshysy Sherhan Murtaza atyndaǵy aýdıtorııa ashyldy, dep habarlaıdy QazAqparat tilshisi ýnıversıtettiń baspasóz qyzmetine silteme jasap.

Aýdıtorııany ashqan aqyn Nurlan Orazalın jazýshynyń ádebı jáne jýrnalıstıka salasyndaǵy zor úlesi men jetistikterin atap ótti.

«Sherhan Murtaza – XXI ǵasyrdyń jarqyn tulǵalarynyń biri. Ol bar ǵumyryn ulttyq mádenıet pen ádebıetti damytýǵa arnap, bolashaq urpaqqa baı rýhanı mura qaldyrdy. Óziniń adaldyǵy men ádildigi úshin Sher-aǵa esimimen tarıhta qaldy. Búgin men Sherhan Murtaza atyndaǵy aýdıtorııanyń ashylǵanyna óte qýanyshtymyn, onyń úlesi men eńbegin biz eshqashan umytpaımyz. Ol Qazaqstan jýrnalısteriniń birneshe býynyn tárbıeledi. Jańa aýdıtorııada bizdiń bolashaq jýrnalısterimizdi shabyttandyratyn erekshe shyǵarmashylyq atmosfera bar. Stýdentterge jáne ýnıversıtet ujymyna úlken tabys pen órkendeý tileımin», – dedi Nurlan Orazalın.

Óz kezeginde Parlament Májilisiniń depýtaty Darhan Myńbaı quttyqtaý sóz sóılep, jańa aýdıtorııaǵa qoldan toqylǵan erekshe kilemdi syıǵa tartty.

Sondaı-aq ýnıversıtet qabyrǵasynda Sherhan Murtazanyń týǵanyna 90 jyl tolýyna arnalǵan «Jańa Qazaqstan jáne Sherhan Murtaza shyǵarmashylyǵyndaǵy ádiletti qoǵam ıdeıasy» atty halyqaralyq ǵylymı-tájirıbelik konferentsııa ótti.

Konferentsııa aıasynda Sherhan Murtazanyń shyǵarmashylyǵy týraly fılm kórsetilip, QR Senatynyń tóraǵasy Máýlen Áshimbaev, Almaty qalasynyń ákimi Erbolat Dosaevtyń quttyqtaýlary jáne onlaın formatta sheteldik ǵalymdardyń da arnaıy quttyqtaýlary oqyldy.

Aıta keteıik, qazaq jýrnalıstıkasynyń metri, klassık jazýshy Sherhan Murtaza «Lenınshil jas» gazetiniń (qazirgi «Jas Alash») tilshisinen «Qazaqstan» memlekettik teleradıokompanııasynyń tóraǵasyna deıingi úlken kásibı joldan ótti. Ár jyldary «Sotsıalıstik Qazaqstan» gazetinde ádebı qyzmetker, «Jazýshy» baspasynyń, «Jalyn» almanahynyń, «Juldyz» jýrnalynyń bas redaktory, Qazaqstan jazýshylar odaǵy basqarmasynyń ekinshi hatshysy, «Qazaq ádebıeti», «Egemen Qazaqstan» basylymdaryn basqaryp, QR Parlamenti Májilisiniń depýtaty boldy.

Sherhan Murtaza – «Tabylǵan teńiz», «Belgisiz soldattyń balasy», «Ahmetjannyń anty», «Myltyqsyz maıdan» povesteri, «41-jylǵy kelinshek», «Internat nany» áńgimeleri, «Qara marjan», bes kitaptan turatyn «Qyzyl jebe», «Aı men Aısha» jáne basqa da shyǵarmalardyń avtory.

Foto: kaznu.kz