Qazaq ulttyq agrarlyq zertteý ýnıversıteti bıýdjet qarajatyn jymqyrý deregine qatysty túsinik berdi
«2020 jyly ýnıversıtet pen «Ai-Tall» JShS arasynda (5,8 mln teńge somasyna «amıak selıtrasyn» satyp alý boıynsha), «KemalhanStroıElıt» JShS-men (15,8 mln teńge somasyna «ammofos» satyp alý jáne jetkizý boıynsha) jáne «QazTraıdSnab» JShS-men (22 mln teńge somasyna «qant júgerisi» tuqymyn satyp alý jáne jetkizý boıynsha) kelisimshart jasalǵan. Joǵaryda kórsetilgen sharttar boıynsha tuqym sebý jáne sebý oryndaryn óńdeýdi rastaý aktisin jalǵan jasaý faktileri anyqtaldy. «DarMırAýdıt» JShS júrgizgen qorytyndyǵa sáıkes ýnıversıtet memleketke 43,8 mln teńge kóleminde zalal keltirdi», - delinedi habarlamada.
Sondaı-aq JOO-da tabys tabý maqsatynda jeke kásipkerlerge jalǵa berilgen birqatar turǵyn emes kommertsııalyq úı-jaı (dúkender, ashanalar jáne t.b.) bolǵan.
«Máselen, 2012-2022 jyldar aralyǵynda Dana JK kommertsııalyq úı-jaılardy (dúken úshin) turaqty túrde jalǵa alǵan, bul rette aı saıynǵy jaldaý aqysy ýnıversıtettiń burynǵy qyzmetkerine qolma-qol aqshamen jáne mobıldi aýdarymdarmen berilip otyrǵan, alaıda, ol ýnıversıtettiń esep shotyna túspegen. Bul faktiler QR QK 190-baby 3-bóligi 1-tarmaǵy jáne QR QK 189-baby 4-bóligi 2-tarmaǵynda kózdelgen qylmystyq quqyq buzýshylyq jasaý faktisi boıynsha SDTBR-inde tirkelgen», - dep habarlady JOO-nyń baspasóz qyzmeti.
Ýnıversıtettiń jańa basshylyǵy 2023 jyldan bastap zańsyz shyǵarylǵan aktıvterdi, onyń ishinde JOO jataqhanalary men oqý aýdıtorııalaryn qaıtarý boıynsha qajetti sharalardy qabyldaǵan.
«QazUAZÝ basshylyǵy ýnıversıtet qyzmetin QR zańnamasynyń talaptaryna sáıkes qalpyna keltirý boıynsha barlyq sharany ary qaraı júrgizedi», - dep habarlady QazUAZÝ-dyń baspasóz qyzmeti.
Eske salaıyq, Almaty qalasynyń prokýratýrasy Qazaq ulttyq agrarlyq zertteý ýnıversıtetin tekserý qorytyndysy boıynsha jalǵan tuqym sebý jáne egis alqaptaryn óńdeý arqyly bıýdjet qarajatyn urlaý faktilerin anyqtaǵan edi.