Qazaq-túrikmen qarym-qatynasy óte tabysty damyp keledi – QR Prezıdenti

<p>ASTANA. KAZINFORM &ndash;Memleket basshysy Túrikmenstan Halk Maslahatynyń tóraǵasy Gýrbangýly Berdimuhamedovpen kezdesti, dep habarlaıdy Aqordanyń baspasóz qyzmeti.</p>

Qasym-Jomart Toqaev Gýrbangýly Berdimuhamedovke V Dúnıejúzilik kóshpendiler oıyndarynyń ashylý saltanatyna qatysýǵa arnaıy kelgeni úshin rızashylyǵyn bildirdi.

Prezıdent ekijaqty yntymaqtastyqty odan ári ilgeriletýde Halk Maslahaty tóraǵasynyń Astanaǵa sapary asa mańyzdy ekenin atap ótti.

Memleket basshysynyń aıtýynsha, qazir qazaq-túrikmen qarym-qatynasy óte tabysty damýda jáne strategııalyq seriktestik deńgeıine tolyq sáıkes keledi.

Óz kezeginde Gýrbangýly Berdimuhamedov Qasym-Jomart Toqaevqa qonaqjaılyq tanytqany úshin alǵys aıtyp, aýqymdy sporttyq is-sharanyń sátti ótýine tilektestik bildirdi. Halk Maslahaty tóraǵasy elimizdiń álemdik arenadaǵy bedelin arttyrýǵa yqpal etetin iri halyqaralyq jıyndardy uıymdastyrýdaǵy Astananyń rólin joǵary baǵalady.

Áńgimelesý barysynda saýda-ekonomıka, energetıka jáne kólik-logıstıka salalarynda buǵan deıin qol jetkizilgen ýaǵdalastyqtarǵa nazar aýdaryldy. Qasym-Jomart Toqaev pen Gýrbangýly Berdimuhamedov birlesken jobalardyń júzege asyrylýyna kóńilderi tolatynyn jetkizdi.

Kezdesýde dostyq ári tatý kórshilik rýhynda jan-jaqty damyp kele jatqan mádenı-gýmanıtarlyq baılanysty odan ári nyǵaıtýdyń mańyzyna mán berildi.

Taraptar Qazaqstan Prezıdentiniń bıyl qazan aıynda Túrikmenstanǵa josparlanyp otyrǵan saparynyń daıyndyq barysyn talqylady.