Qazaq-túrikmen shekarasynda ken oryndaryn birlesip ıgerý máselesi qaraldy - Nazarbaev
Qazaqstan Prezıdenti eki el arasynda kólik ınfraqurylymy, energetıka sııaqty yntymaqtastyqtyń basymdyqty baǵyttary jaıynda aıta kele: "Biz "Túrikmenstan - Ózbekstan - Qazaqstan - Qytaı" gaz qubyry boıynsha tyǵyz jumys jasap kelemiz. Osy saladaǵy yntymaqtastyqty ary qaraı nyǵaıtý maqsatynda transshekaralyq ken oryndaryn birlesip ıgerý máselesi de qaraldy. Qazaqstan men Túrikmenstan ǵarysh salasynda birlesip jumys isteýge múddeli. Kelissózder kezinde talqyǵa salynǵan mańyzdy máselelerdiń biri - sý-energetıka salasyndaǵy problema. Osy oraıda Halyqaralyq Araldy qutqarý qorynyń jumysyn jandandyrý jaıy sóz boldy. Biz barlyq kórshilerimizdi osy saladaǵy problemalardy sheshý kezinde ortaq múddeni eskerýge úndeımiz. Osy ózen-sýlardy paıdalanǵanda mıllıondaǵan xalyqtardyń taǵdyryn umytpaý qajet", - dedi N.Nazarbaev.
Memleket basshysy Halyqaralyq Araldy qutqarý qoryna Túrikmenstan prezıdenti Gýrbangýly Berdimuxamedovtiń tóraǵalyq etip jatqanyn taǵy bir márte eske salyp, Ashxabadta úlken kezdesýdiń ótetinine senim bildirdi.
Óz kezeginde Túrikmenstan prezıdenti Gýrbangýly Berdimuxamedov Astanada kelissózder kezinde barlyq máselelerdiń qamtylǵanyn jetkizip, Qazaqstan men Túrikmenstannyń ustanymy ortaq ekenin málimdedi. "Biz ortaq máselelerdi de qarastyrdyq. Sonyń ishinde Kaspıı teńizi de bar. Kaspıı - bárimizge ortaq baılyǵymyz. Sondyqtan teńizdiń ekologııalyq máselelerine, bıoalýandylyqty saqtaý problemasyna basa nazar aýdarǵan jón. Al Araldy saqtaý qory boıynsha biz arnaıy tujyrymdamany bekittik. Sol qujatqa sáıkes jumys isteıtin bolamyz. Araldyń ekologııasyn da nazardan tys qaldyrmaý qajet", - dep atap kórsetti Berdimuxamedov.