Qazaq-túrikmen memlekettik shekarasynda rejım ornaıdy

ASTANA. QazAqparat – Májilis «Qazaqstan Respýblıkasynyń Úkimeti men Túrikmenstan Úkimeti arasyndaǵy Qazaqstan-Túrikmenstan memlekettik shekarasynyń rejımi týraly kelisimdi ratıfıkatsııalaý týraly» Qazaqstan Respýblıkasy Zańyn qabyldady, dep habarlaıdy QazAqparat tilshisi.

Kelisimge 2021 jylǵy 25 qazan kúni Ashhabad qalasynda memleketterdiń Premer-Mınıstrleriniń orynbasarlary deńgeıinde qol qoıylǵan.

Kelisimniń basty maqsaty – quqyqtyq negizdi belgileý jáne memlekettik shekarada Qazaqstan Respýblıkasy men Túrikmenstan arasyndaǵy qarym-qatynasty retteý.

Kelisimde Qazaqstan-Túrikmenstan memlekettik shekarasynyń rejımin belgileý jáne Qazaqstan Respýblıkasynyń ulttyq qaýipsizdigin odan ary nyǵaıtý qarastyrylady.

«Memlekettik shekara rejımi shekarada áreket etetin erejemen kelesi tártipti quraıdy. Birinshi – memlekettik shekarany kútip ustaý. Ekinshi – memlekettik shekara arqyly adamdardy, kólik quraldaryn, júk pen ózge múlikti ótkizý. Úshinshi – memlekettik shekaranyń ústinen ushýlardy júzege asyrý. Tórtinshi – memlekettik shekarada, shekaralyq beldeýlerde, sondaı-aq shekara sýy sheginde sharýashylyq jáne ózge de qyzmetterdi júrgizý. Besinshi – shekaradaǵy tosyn oqıǵany sheshý», - dedi zań jobasyn tanystyrǵan Ulttyq qaýipsizdik komıteti tóraǵasynyń orynbasary – Shekara qyzmetiniń dırektory Erlan Aldajumanov.

Erlan Aldajumanovtyń atap ótýinshe, kelisim merzimsiz sanalady jáne taraptardyń biri ózge tarapty onyń qoldanysyn toqtatý týraly nıetin dıplomatııalyq arna arqyly jazbasha túrde aqparat bermegenshe qoldanysta bolady.