Qazaq tilin jasandy ıntellekt arqyly damytýdyń modeli ázirlenip jatyr
Joba – Qazaqstanda jáne Ortalyq Azııada jasandy ıntellekt múmkindikterin damytýǵa arnalǵan.
«KAZ-LLM júıesi sizben qazaqsha sóılese alady, suraqtarǵa qazaqsha jaýap beredi. Qosymsha orys, aǵylshyn jáne túrik tili qatar júredi. Bul jobany bıyl sáýirde qolǵa aldyq, qazir shamamen 30 mlrd token jınadyq. Qyrkúıekte derekterdi jınaý jumysyn aıaqtaımyz, al aıdyń ortasynda boljamdy model daıyn bolady dep josparlap otyrmyz. 16 jeltoqsanda jobany qalyń jurtqa jarııalaımyz», - dedi Nazarbaev ýnıversıteti Aqyldy júıeler jáne jasandy ıntellekt ınstıtýty (ISSAI) dırektorynyń operatsııalyq qyzmetter jónindegi orynbasary Erbol Absalıamov baspasóz máslıhatynda.
Odan ári qazaq tiliniń aýqymdy modelin Tsıfrlyq damý, ınnovatsııalar jáne aeroǵarysh ónerkásibi mınıstrligi júzege asyrady.
«Júıe vıkıpedııadaǵy maqalalar, jańalyqtar, memlekettik saıttar jáne jalpy qoldanymdaǵy (Common Crawl) derekkózderden turady. Keıingi 5 jylda ISSAI arnaıy qazaq tili týraly kóptegen derekter jınaǵyn ázirledi. Keń aýqymdy paıdalanýdy qamtamasyz etý úshin platformaǵa tirkelý usynsa, ozyq qoldanýshylar úshin arnaıy qoldanbaly baǵdarlamalaý ınterfeısin (API) usynady», - deıdi ol.
Sondaı-aq ISSAI ınstıtýty taǵy birneshe jobany usynyp otyr:
– KazEmoTTS – qazaq tiliniń emotsıonaldy dybystalýyna arnalǵan derekter jınaǵy;
– Tilmash – qazaq, orys, aǵylshyn, túrik, tatar jáne ózbek tilderine eki jaqty aýdarma jasaýǵa múmkindik beretin joba;
– Umay – áıel daýsynda qazaq tilinde erkin sóıleıtin vırtýaldy kómekshi.