Qazaq tilin bilý talaby keıbir azamattardyń quqyǵyn shekteıdi –Memqyzmet agenttigi

<p>Ortalyq kommýnıkatsııalar qyzmetinde ótken brıfıngide Memlekettik qyzmet isteri agenttigi tóraǵasynyń orynbasary Azamat Jolmanov memqyzmetshige qazaq tilin erkin meńgerý talabyn qoıý normasy nelikten alynyp tastalǵanyn túsindirdi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Baspasóz máslıhatynda BAQ ókilderi Azamat Jolmanovqa 2021 jyly memlekettik qyzmetke ornalasýǵa nıetti kandıdat qazaq tilin mindetti túrde meńgerýi kerek degen bastama kóterilgenin eske salyp, qazir mundaı talaptyń bar-joǵyn surady.

«Shynymen de, 2021 jyly zań jobasynda osyndaı máseleler qarastyrylǵan bolatyn. Talqylaý kezinde osy normanyń keıbir azamattardyń quqyǵyn shekteıtini anyqtaldy. Konstıtýtsııaǵa sáıkes, memlekettik qyzmetke kirerde eshkimke dini, tili, ulty arqyly dıskrımınatsııa jasaýǵa bolmaıdy. Sondyqtan biz bul máseleni alyp tastadyq. Alaıda, Prezıdenttik jastar kadrlyq rezervine irikteý kezinde V1 deńgeıinen tómen meńgergen kandıdattar jiberilmeıdi. Sonymen qatar akademııaǵa túsetin memlekettik qyzmetshiler de qazaq tilin bilýi tıis», - dedi Azamat Jolmanov Ortalyq kommýnıkatsııalar qyzmetinde ótken brıfıngide.

Qosa keteıik, bıyl memlekettik qyzmet bedeline nuqsan keltirgen 92 maman jaýapqa tartyldy. Al jalpy 9 aıdyń qorytyndysy boıynsha ádep keńesterinde memlekettik qyzmetshilerge qatysty 300-den astam tártiptik is qaralǵan.