Qazaq tili bıznestiń, ǵylym men tehnıkanyń tiline aınala bastady - Prezıdent
«Tilimizdiń qoldaný aıasyn keńeıte túsý memlekettik saıasattyń basty baǵyty bolyp qala beredi. Bul – biz úshin myzǵymas ustanym. Elimizde qazaq tiline degen suranys jyl ótken saıyn artyp keledi. Qazaq tili bıznestiń, ǵylym men tehnıkanyń tiline aınala bastady. Bul úrdisti odan ári damytýdyń eń tıimdi ári tóte joly – aǵartýshylyq»,-dedi Memleket basshysy.
Sondaı-aq Prezıdent sózinde qazir iri kitap dúkenderinde qazaq tilindegi týyndylardyń úlesi arta túskenin atap ótti.
«Sońǵy kezde baspagerlerdiń jańa býyny álemdik bestsellerge aınalǵan shyǵarmalardy aýdaryp júr. Kóptegen kitaptardy shyǵaryp jatyr. Aýdarylǵan kitaptardyń ishinde kórkem ádebıet qana emes, iskerlik baǵyttaǵy týyndylar da kóp. Memlekettik saıasattyń máni – osynda. Eshkimdi májbúrlemeı, kúndelikti ómirdegi qajettilikti arttyrý arqyly tilimizdiń tuǵyryn nyǵaıta beremiz. Memlekettik tilge qatysty qur sózden eshteńe shyqpaıdy. Eń bastysy, naqty is bolýy kerek»,-dedi Qasym-Jomart Toqaev.
Osy tusta, Prezıdent halyqaralyq «Qazaq tili qoǵamyna» erekshe toqtaldy.
«Qazir Ulttyq Quryltaıdyń múshesi Raýan Kenjehanuly bastaǵan jańa býyn ókilderi uıym tizginin qolǵa aldy. Men qoǵamnyń «Qazaq tili» endaýment qoryn qurý týraly usynysyn qoldadym. Osy jaqsy bastamany qolynda qarjysy bar azamattar jalǵastyryp áketti. Tilimizge qamqorlyq tanytqan jandarǵa erekshe rızashylyǵymdy bildiremin. Qaltaly, janashyr azamattar qordy ulǵaıtýǵa úles qosady dep senemin. Men ekonomıkany damytý úshin «Kreatıvti ındýstrııanyń» mán-mańyzy zor ekenin únemi aıtyp júrmin. Bul memlekettik tildiń bolashaǵy úshin de óte mańyzdy. Qazaq tilin damytamyz desek, qazirgi zamanǵy ádis-tásilderdi barynsha tıimdi paıdalanǵan durys»,-dep qorytty Memleket basshysy.