Qazaq tilinen emtıhan tapsyratyn 5-8 jáne 10-synyp oqýshylarynyń baǵasy attestatqa enbeıdi

ASTANA. QazAqparat – Taıaýda kelesi oqý jylynan bastap 5-8 jáne 10-synyptardy aıaqtaǵan oqýshylar qazaq tilinen emtıhan tapsyratyny málim boldy. Osyǵan baılanysty QazAqparat tilshisi engizilgeli otyrǵan normanyń mehanızimi týraly Oqý-aǵartý mınıstrliginen anyqtap kórdi.

«Memlekettik tildiń mártebesin arttyrý, meńgerý sapasyn kúsheıtý, qoldaný aıasyn keńeıtý maqsatynda 2023-2024 oqý jylynan bastap 5-8, 10 synyptarda qazaq tili boıynsha emtıhan engizý qarastyrylýda. Bul norma bekitilse, onda ol 2023 jyldyń 1 qyrkúıeginen bastap qoldanysqa enetin bolady. Qazaq tili memlekettik til retinde barlyq orta bilim berý uıymdarynda 1-11 synyptarda mindetti pán retinde oqytylady. 9, 11 synyptarda bilim alýshylardy qorytyndy attestattaý formasy men mindetti pánder ózgermeıdi. Qazaq tilinen emtıhan oqý baǵdarlamasyn meńgerý nátıjesi boıynsha standartqa sáıkes jazbasha jáne aýyzsha nysanda ótkiziledi», - dep málim etti mınıstrliktiń baspasóz qyzmetinen tilshi saýalyna oraı.

Vedomstvo dereginshe, orta jáne jalpy orta bilim attestaty burynǵy tártippen qorytyndy attestattaýdan ótken 9 jáne 11 synyp oqýshylaryna beriledi. Bul oraıda, 9 synyp - 4, 11 synyp oqýshylary 5 emtıhan tapsyrady.

«9, 11 synyptardyń bilim alýshylary dástúrli túrde jyl saıyn mindetti emtıhandardyń biri bolyp tabylatyn «Qazaq tilinen» qorytyndy attestattaý tapsyrady. Onyń baǵasy attestatqa jazylady. Al qoldanysqa enetin 5-8, 10 synyp oqýshylarynyń «Qazaq tili» páninen emtıhan tapsyrýy - aralyq attestattaý bolyp tabylady. Onyń baǵasy attestatqa jazylmaıdy», - dep túsindirdi vedomstvodan.