Qazaq tilindegi beınesabaqtar qazaqstandyq telearnadan kórsetiledi

NUR-SULTAN. QazAqparat - 1 qyrkúıekten bastap qazaq tilindegi beınesabaqtar «Balapan» telearnasynan kórsetiledi, dep habarlaıdy QazAqparat .

«Elimizdegi karantın talaptaryna baılanysty 1 qyrkúıek, jańa oqý jylynan bastap Qazaqstan Respýblıkasynda orta bilim berý qashyqtan oqytý júıesinde jalǵasady. QR Bilim jáne ǵylym mınıstrligi men QR Aqparat jáne qoǵamdyq damý mınıstrligi birlese otyryp, dúısenbi-juma 09:00-18:00 aralyǵynda 1-11 synyptardyń oqý pánderi boıynsha beınesabaqtardy qazaq tilinde «Balapan» telearnasy kórsetedi»,-delingen «Qazaqstan» RTRK taratqan aqparatta .

Sondaı-aq onda «Qazaqstan» respýblıkalyq teleradıokorporatsııasynyń quramyndaǵy «Balapan» telearnasy «Otau TV» spýtnıktik operatory, «Alma TV» kabeldik operatory, ID TV tsıfrlyq teledıdar qyzmeti arqyly qoljetimdi ekendigi aıtylǵan.

Sonymen qatar arna balapan.tv resmı saıty men qazaqstan.tv mobıldi qosymshasy arqyly, «Balapan»-nyń YouTube-tegi resmı kanalynan da onlaın kórsetiledi. «Android» jáne «iOS» platformalaryna laıyqtalǵan mobıldi qosymshany «App Store»,«Play Market» servısteri arqyly tegin júkteý múmkindigi qarastyrylǵan.