Qazaq tilinde radıkaldy saıttar qaptap barady - QR UQK
UQK Lańkestikke qarsy ortalyqtyń shtab basshysy Sergeı Shveıkınniń málim etýinshe, buryn mundaı úrdis baıqalmaǵan bolatyn.
«Radıkaldaný oshaǵy Internet ekeni barshaǵa málim. Ekstremıstik materıaldardyń sany geometrııalyq progessııamen artýda. Byltyrdyń ózinde lańkestik pen ekstremızm ıdeıalaryn Internet arqyly taratýdyń 700 myń faktisi anyqtaldy jáne joıyldy. Bul kórsetkish 2015 jylǵymen salystyrǵanda 4,5 esege, 2014 jylǵymen salystyrǵanda 33 esege kóp. Qazaq tilinde de materıaldar daıyndala bastady. Bul olardyń maqsattyq baǵyttaryn kórsetip otyr. Bir jyl buryn bundaı kórinister birneshe ese az bolatyn», - dedi ol Bas prokýratýrada ótken halyqaralyq dóńgelek ústelde.
UQK ókili atap ótkenindeı, Viber, Twitter, WhatsApp syndy messendjerlerdiń paıda bolýy, lańkesterdiń bir-birimen baılanys ornatýyna jáne óz qyzmetterin úılestirýge, basqarýǵa kóp jaǵdaılar jasap otyr.
«Lańkester árdaıym akkaýnttaryn aýystyryp otyrady, jelige anonımdik materıal men radıkaldy rolıkterdi jarııalaý úshin arnaıy baǵdarlamalar qoldanady. Ózderiniń geografııalyq ornalasqan jerlerin ınternet arqyly anyqtaýǵa jol bermeıtin tehnıkalyq múmkindikterdi paıdalanady. Osynyń aıasynda ınternet-resýrstar paıdalanýshyǵa saıttarda radıkaldy mazmundaǵy materıaldar týraly eskertý bere almaıdy. Osyndaı resýrstardyń basshylary ózderinde jarııalanyp otyrǵan materıaldardyń mazmunyna úńile bermeıdi», - dep atap ótti ol.
Osy oraıda, QR UQK ınternet jelisindegi radıkaldy materıaldarǵa qarsy úgit-nasıhat jumystaryn belsendi qolǵa alǵan.
«Jumysymyzdyń negizgi basymdyqtarynyń biri - lańkestik qateriniń aldyn alý bolmaq. Lańkestikti ishten jáne syrttan qarjylandyrýdy aldyn alý jáne anyqtaý boıynsha arnaıy sharalar júzege asyrylady. Sonymen qatar qylmystyq toptardyń dinı-ekstremıstik toptarmen birigýin boldyrmaý kózdelgen», - dedi Shveıkın.
Aıta keteıik, bunyń aldynda habarlanǵanyndaı, 2016 jyly lańkestik toptardy qarjylandyrǵany úshin Qazaqstanda 3 adam qylmystyq jaýapkershilikke tartyldy.