Qazaq tilin úırenýshilerge aýdıovızýaldy ádis usynylady
Ádisker-ǵalymdardyń pikirinshe, tildi oqytý sabaqtarynda dybystyq jáne beıne kórnekilikti jıi jáne júıeli túrde qoldaný arqyly tildi úırenýshiler tobynda jasandy tildik orta qalyptastyrý asa mańyzdy. Óıtkeni tildik ortaǵa boılaý arqyly til úırenýshiler belsendi túrde tildik qatynasqa túsedi. Sondaı-aq tildik kedergini joıý arqyly olardyń tyńdaý, sóıleý, jazý, oqý daǵdylary jetile túsedi. Sondyqtan da «Til-Qazyna» ulttyq-ǵylymı praktıkalyq ortalyǵy onlaın kýrstyń kezekti sanyn «Qazaq tilin aýdıovızýaldy ádistermen oqytý» tásiline arnaýdy jón sanady. «Memlekettik tildi oqytý ádistemesi» onlaın kýrsyn «Til-Qazyna» ulttyq ǵylymı-praktıkalyq ortalyǵy Ádisteme basqarmasynyń basshysy, fılologııa ǵylymdarynyń kandıdaty Sofııa Qajyaqparqyzy júrgizdi. Onlaın sabaqqa 65 maman qatysyp, til úıretýdiń sońǵy tehnologııalary men ádis-tásilderimen tanysty.
- Aqparattyq tehnologııanyń qarqyndy damyǵan ýaqytynda zamanaýı tehnologııalardy qoldaný arqyly sabaqty túrlendirip ótkizý, til úırenýshiniń tildi úırenýge degen yntasyn, qyzyǵýshylyǵyn oıatyp, onyń sabaqtaǵy belsendiligin arttyrady. Osyndaı zamanaýı tehnologııalarǵa qurylǵan sabaqtardyń biri – qazaq tilin aýdıovızýaldy ádistermen oqytý,- deıdi S.Qajyaqparqyzy.
Ádiskerdiń aıtýynsha, aýdıovızýaldy materıaldar tildiń paralıngvıstıkalyq elementterimen qatar, kózben kóretin, ıaǵnı vızýaldy elementterdi de baıqaýǵa, kórýge múmkindik beredi eken. Árıne, ol aqparatty jyldam qabyldaýǵa, ony tez túsinýge jáne esinde jaqsy saqtaýǵa jol ashady.
Onlaın kýrsta taqyrypqa saı arnaıy daıyndalǵan eki mınýttyq vıdeojazba negizinde aýdıovızýaldy ádistiń tıimdiligi dáleldenip, qoldaný tásilderi jaıly paıdaly ádistemelik keńester berildi, ınnovatsııalyq jattyǵýlar túrleri usynylady. Tyńdarmanǵa usynylǵan tyń aqparatty QR Mádenıet jáne sport mınıstrliginiń eldegi tótenshe jaǵdaıǵa baılanysty arnaıy ashqan Facebook-tegi jelisindegi ONLINE bol paraqshasynan tanysýǵa bolady.
Aıta keteıik, «Memlekettik tildi oqytý ádistemesi» onlaın kýrsy 10 sáýirge deıin jalǵasady. Turaqty tyńdarmanǵa «Til-Qazyna» ortalyǵynyń sertıfıkaty tabystalady.