Qazaq tilin úırenýge arnalǵan saıttar men qosymshalar tizimi
Osy oraıda QR Tuńǵysh Prezıdenti - Elbasy qory men Memlekettik tildi damytý qory qazaq tilin úıretýge jáne qazaq mádenıetimen, salt-dástúrimen tanystyrýǵa arnalǵan jobalaryn usynady, dep habarlaıdy QazAqparat.
«Qazaqstandaǵy alǵashqy qazaq tilin úırenýge arnalǵan tegin onlaın portal Soyle.kz dep atalady. Munda deńgeı boıynsha sabaqtar, jattyǵýlary bar taqyryptyq leksıka, karaoke, «Telegram-bot», «Borba slov» oıyny jáne ózge de paıdaly quraldar bar. Saıt kómegimen az ǵana ýaqytta kez kelgen adam qazaq tilin meńgerip, qazaq tilinde sóıleı alatyn dárejege jetedi. Sonymen birge, portaldyń aǵylshyn-latyn nusqasy jáne mobıldi qosymshasy da barlyǵyna qoljetimdi», - dep habarlady QR Tuńǵysh Prezıdenti - Elbasy qorynyń baspasóz qyzmeti.
Mektep jasyna deıingi balalarǵa arnalǵan qarapaıym ári ońaı basqarylatyn Bala.soyle.kz veb saıty balalarǵa qazaq álipbıin úırenýge, sanaý jáne dybystyq sózdikti qoldana otyryp, sózderdi jyldam jattaýǵa kómektesedi. Saıttyń mobıldi qosymshasy bar.
Al Youtube ınternet platformasyndaǵy Soyletube beınerolıkteri de erekshe ádispen kúndelikti ómirde qoldanylatyn aýyzsha sóıleý tili men sóz tirkesterin meńgerýge kómektesedi.
Sonymen birge, Qor qaramaǵynda qazaq tilinde Tatti alma portaly bar, onda balalardyń oqýǵa degen qyzyǵýshylyǵyn oıatýǵa basa nazar aýdarylady.
«Abaialemi.kz - Abaıdyń ómiri men shyǵarmashylyǵyna arnalǵan tuńǵysh onlaın entsıklopedııa. Munda qazaqtyń kórnekti aǵartýshy aqynynyń ómirbaıany men shyǵarmashylyǵy týraly keń kólemde materıaldar jınaqtalǵan. «Uly dala ańyzdary» jobasy - «Uly mahabbat týraly jeti hıkaıa» jáne «Qazaq jeriniń uly batyrlary» atty eki taraýdan turatyn veb-grafıkalyq romandar serııasy. Bizdiń grafıkalyq romandarymyzdy nemese komıksterimizdi qazaq, orys jáne aǵylshyn tilderinde oqýǵa bolady. Ol úshin arnaıy qurylǵan QQazcomics.kz saıty men mobıldi qosymsha iske qosylǵan», - deıdi Qor.
Al «Qazaqstan 3D» mobıldi qosymshasynyń kómegimen Qazaqstannyń kórikti jerlerimen jáne tabıǵatymen tanysýǵa bolady. Paıdalanýshylarǵa yńǵaıly bolý úshin qosymsha úsh tilde: qazaq, orys jáne aǵylshyn tilderinde jumys isteıdi. Odan bólek, qazaq mádenıetin, ulttyq tarıhy men dástúrin qyzyqty faktilermen tanystyrýǵa baǵyttalǵan «Jeti qazyna», «Qazaqstannyń uly tulǵalary», «Meniń Qazaqstanym», «Qazaqstan merekeleri» jobalary bar.
«Kim bilgish?» ıntellektýaldy-tanymdyq oıyny da úsh tilde: qazaq, aǵylshyn jáne orys tilderinde qoljetimdi. Sport, óner, Qazaqstan tarıhy, tabıǵaty, ǵylymy jáne t.b. túrli taqyryptaǵy suraqtarmen qamtylǵan jáne álemniń kez kelgen buryshynda otyryp, birneshe oıynshymen básekege túsýge bolady.
«Bizdiń barlyq jobalarymyzdyń mobıldi qosymshalary qoljetimdi ári tegin. Sizge tek veb-saıtty nemese mobıldi qosymshany ashyp, qazaq mádenıetiniń qyzyqty álemine enip, qazaq tiline arnaıy ýaqyt bólýińiz qajet», - deıdi Tuńǵysh Prezıdent qory.