Qazaq tilin onlaın rejimde úıretetin mobıldi qosymsha shyqty
Soyle.kz mobıldi qosymshasy paıdalanýshylarǵa memlekettik tildi tegin, ózderine qolaıly ýaqytta ári jyldam úırenýge múmkindik bermek.
Mobıldik qosymshany paıdalaný nátıjesinde árbir adam arnaıy tildik kýrstarǵa ketetin altyn ýaqytyn únemdeı alady. Soyle.kz qosymshasyn telefonǵa nemese planshetke júktep alyp, memlekettik tildi ózińizge yńǵaıly ýaqytta úırenýge bolady.
«Bir jyl buryn biz Soyle.kz atty qazaq tilin onlaın rejimde oqytatyn tegin portal ashqan bolatynbyz. Bizdiń portaldy bir jyldyń ishinde álemniń ár qıyrynan 250 myńnan astam adam paıdalanǵan bolsa, búgingi tańda portalymyzda tirkelip, qazaq tilin kúndelikti onlaın rejimde úzbeı oqyp jatqandardyń sany 15 myńnan asyp, 16 myńǵa jýyqtap qaldy. Búgin biz Soyle.kz portalynyń mobıldi qosymshasyn jáne sozdik.soyle.kz taqyryptyq sózdikti tanystyramyz. Sondaı-aq «El bolam deseń, besigińdi túze» deıdi ǵoı qazaq halqy, sol sııaqty búldirshinderimizge arnap úlken ınternet portal ashaıyn dep otyrmyz» - dedi Memlekettik tildi damytý Qorynyń dırektory Azat Shaýeev Ortalyq kommýnıkatsııalar qyzmetinde ótken sharada.
Qosymshaǵa Soyle.kz portalynyń barlyq bólimderi jáne de 3500-ge jýyq sóz ben 700-den astam tildesý úlgileri tolyqtaı dybystalǵan «Taqyryptyq sózdik» materıaldary enip otyr. Jınaqtalǵan 50 taqyryp kúndelikti ómirdiń negizgi salalalaryn qamtıdy, bul este saqtaýda qıyndyq týdyratyn sózderdi kezeń-kezeńmen meńgerýge múmkindik beredi.
Qazirgi ýaqytta qosymshany Android OS smartfondaryna júktep alýǵa bolady. 2015 jyly iOS platformasyna shyǵý josparlanyp otyr. Aıta keteıik, Soyle.kz Qazaqstan Respýblıkasy Tuńǵysh Prezıdenti - Elbasy Qory, «Samuryq-Qazyna» AQ jáne «Samsung Electronics» kompanııasynyń qoldaýymen ashylǵan qazaq tilin onlaın rejiminde tegin úıretetin tuńǵysh ınternet portal. Soyle.kz Qazaqstan Respýblıkasynyń Prezıdenti N.Nazarbaevtyń memlekettik tildiń qoǵamdaǵy mártebesin arttyrý, damytý jáne qoldanys aıasyn keńeıtý baǵytyndaǵy talap-mindetterine saı ázirlengen ozyq ІT joba. Al Balalarǵa arnalǵan «Balalarǵa arnalǵan qazaq tili» - Bala.soyle.kz portaly - mektepke deıingi búldirshinder men bastaýysh synyp oqýshylaryna arnalǵan dıstantsııalyq oqytyp-úıretý júıesi.
«Oıyn - tárbıe quraly, aqyl-oıdy damytady, tildi ustartady, sózdik qordy molaıtady, ómirdi tanyp, sezimdi keńeıtedi, tárbıeleıdi. Sondyqtan da biz balany oınata otyryp sóıletýge, sýretterdi qarap, zattardy sıpattaý, jumbaq esepterdi sheshý, qurastyrý, taqpaqtar jattaý arqyly olardyń qyzyǵýshylyǵyn arttyrýǵa tyrystyq», - deıdi qor basshysy.
Portalda balalar álipbımen, aýdıo-sózdikter arqyly jańa sózdermen tanysyp, sanaýdy úırenedi. «Ertegiler», «Sandyqsha», «Oıyndar» atty qosymsha bólimderde balalar qazaq tilinde mýltfılmder kórip, án aıtyp, ertegi tyńdap, sanamaqtardy úırenip, taǵy da san alýan qyzyqty sabaqtardy taba alady.