Qazaq tilin oqytý ortalyqtary úshin biryńǵaı baǵdarlama jasaý qajet - professor N.Tólenbergenova

ASTANA. 4 mamyr. QazAqparat - Búgin QR Ulttyq akademııalyq kitaphanasynda «Bir til - bir el - bir taǵdyr» taqyrybynda «dóńgelek ústel» ótti.

Jıyn barysynda memlekettik tildi Qazaqstan halqyn biriktirýshi basty faktor retinde damytý máselesi talqylanyp, tıisti usynystar aıtyldy. Máselen, QR Prezıdenti janyndaǵy Memlekettik basqarý akademııasynyń «Tilder jáne aýdarma isi» kafedrasynyń professory Nazıgúl Tólenbergenovanyń oıynsha, elimizdegi tildi oqytý ortalyqtary úshin biryńǵaı baǵdarlama jasaý qajet. «Búgingi tańda respýblıka boıynsha 150 oqytý ortalyǵy bar. Solar úshin birizdi baǵdarlama jasap, Til komıtetiniń tıisti nusqaýlaryn jibersek, barlyǵy tildi oqytýdyń biryńǵaı júıesin qoldanady. Ol jetilgen bir ádistemeni jasap shyǵarý qajet. Qazaq tilin úırenbeımin degen adam joq. Bári ózimizge baılanysty. Prezıdent te memlekettik tildi damytýǵa qajetti barlyq jaǵdaıdyń jasalǵany týraly ylǵı aıtyp otyrady. Normatıvtik baza bar, qol jetkizgen jetistikter de joq emes. Alaıda kemshilikterdiń bolyp jatqandyǵyn da moıyndaý qajet», - deıdi N. Tólenbergenova.