Qazaq tilin halyqaralyq deńgeıge jaqyndatý kerek - QR Prezıdenti

ASTANA. QazAqparat - 2025 jylǵa deıin bilim berýdiń barlyq deńgeıinde latyn álipbıine kóshýdiń naqty kestesin jasaý qajet. Bul jaıynda búgin respýblıkalyq basylymdarda jarııalanǵan QR Prezıdenti Nursultan Nazarbaevtyń Qazaqstan halqyna arnalǵan Joldaýynda aıtylǵan, dep habarlaıdy QazAqparat.

«Qazaqstandyqtardyń bolashaǵy - qazaq, orys jáne aǵylshyn tilderin erkin meńgerýinde. Orys tildi mektepter úshin qazaq tilin oqytýdyń jańa ádistemesi ázirlenip, engizilýde. Eger biz qazaq tili ǵumyrly bolsyn desek, ony jónsiz termınologııamen qıyndatpaı, qazirgi zamanǵa laıyqtaýymyz qajet. Alaıda, sońǵy jyldary álemde qalyptasqan 7 myń termın qazaq tiline aýdarylǵan. Mundaı «jańalyqtar» keıde kúlkińdi keltiredi. Mysaly, «ǵalamtor» (Internet), «qoltyraýyn» (krokodıl), «kúısandyq» (fortepıano) jáne taǵy sol sııaqtylar tolyp jatyr. Osyndaı aýdarmalardy negizdeý tásilderin qaıta qarastyryp, termınologııa turǵysynan qazaq tilin halyqaralyq deńgeıge jaqyndatý kerek», - dedi Qazaqstan Prezıdenti Joldaýynda.

Osy rette Memleket basshysy latyn álipbıine kóshý joǵaryda atalǵan máseleni retteýge múmkindik beretindigin atap ótedi. 2025 jylǵa deıin bilim berýdiń barlyq deńgeıinde latyn álipbıine kóshýdiń naqty kestesin jasaý qajettigine nazar aýdartady.