Qazaq tilin dalada úırendim - mınıstr Sklıar

ASTANA. QazAqparat - QR Indýstrııa jáne ınfraqurylymdyq damý mınıstri Roman Sklıar jańa qyzmette Úkimettegi alǵashqy baıandamasyn jasady, dep xabarlaıdy QazAqparat tilshisi.

Jańa mınıstr óz baıandamasyn tolyǵymen memlekettik tilde jasap shyqty. R.Sklıar kópbalaly otbasylarǵa jaldamaly baspana taratýdyń merzimi týraly aıtty. Onyń aıtýynsha, búginde respýblıka boıynsha 340 myń kópbalaly otbasy bar. Sonyń ishinde 28 myń otbasy turǵyn úı kezeginde tur.

«Memleket basshysynyń tapsyrmasyna sáıkes, biz jeti jyldyń ishinde jyl saıyn 6 myń jaldamaly páterdi salyp otyramyz. Sóıtip, 2025 jylǵa deıin 40 myńnan astam jaldamaly páter turǵyzylady. Sol kezde kezekte turǵan kópbalaly otbasylardyń baspana máselesi tolyǵymen sheshiledi. Bıyl mamyr aıynda biz kópbalaly otbasylarǵa jaldamaly páterdi berýdi bastaımyz», - dedi R.Sklıar.

Budan bólek, «Nur Otan» partııasynyń XVIII sezinde Memleket basshysy Nursultan Nazarbaev áleýmettik jaǵynan az qamtylǵan otbasylarǵa 2-3 paıyzben ıpoteka berýdi tapsyrǵan bolatyn.

Búgin mınıstr Roman Sklıar áleýmettik jaǵynan az qamtylǵan otbasylarǵa beriletin ıpotekanyń sharttaryn da atady.

«Az qamtylǵan otbasylarǵa Turǵyn úı qurylys jınaq banki arqyly 20 jylǵa jeńildetilgen nesıe engiziledi. Jyldyq mólsherlemesi 2 protsent bolady. Atalǵan nesıe kelesi sanattar - tórt jáne odan kóp balasy bar otbasylarǵa, múgedek balasy bar nemese múgedek balany tárbıeleıtin otbasylarǵa jáne kámeletke tolmaǵan balalary bar tolyq emes otbasylarǵa beriledi. Eki jylda biz atalǵan sanattarǵa 22 myń jeńildetilgen zaım berýdi josparlap otyrmyz», - dep atap kórsetti R.Sklıar.

Onyń sózine qaraǵanda, bastapqy jarna 10 protsent bolady.

«Negizi, bul Turǵyn úı qurylys jınaq bankiniń bólek baǵdarlamasy bolady. Jaqyn arada biz bank basshylyǵymen birge bárin jan-jaqty túsindiretin bolamyz. Arnaıy broshıýrany da shyǵaramyz. Sol jerde bári jazylady», - dep atap kórsetti R.Sklıar.

Al Úkimet otyrysynan keıin jýrnalıster odan qazaq tilin qalaı jáne qaı jerde jetik meńgergenin surady.

«Qazaq tilinde sóılegen qıyn emes. Osy joly sál-pál aýyryp qaldym. Daýysym durys emes sııaqty. Ustazym joq. Qazaq tilin dalada úırendim», - deıdi R.Sklıar.

Aıta keteıik, ótken jyly maýsym aıynda Roman Sklıar QR Investıtsııalar jáne damý vıtse-mınıstri bolyp turǵanda Úkimette «Nurly jer» baǵdarlamasy boıynsha qazaq tilinde baıandama jasady.

Otyrystan keıin QazAqparat tilshisine suxbat bergen vıtse-mınıstr qazaq tilin qalaı úırengenin aıtyp berdi.

«Men alty jasymda aýylda turǵanmyn. Jarty jyldaı aýylda boldym. Sodan qalǵan bolýy kerek. Jeke repetıtorym joq. Oǵan ýaqyt tabý da qıyn», - dedi R.Sklıar.