Qazaq tili týraly arnaıy joba ázirleý kerek - Maksım Spotkaı

NUR-SULTAN. QazAqparat – Ulttyq qoǵamdyq senim keńesiniń saıası reformalar jónindegi tobynyń múshesi Maskım Spotkaı ózge elderdiń ulttyq jobalaryn qaıtalamaý týraly aıtty, dep habarlaıdy QazAqparat tilshisi.

«Ózge elderdiń ulttyq jobalaryn qaıtalaýdan bas tartýymyz kerek. Elimizdiń erekshelikteri eskerilmeı jasalǵan sheteldik tájirıbeler árdaıym sátsiz bolady. Sondyqtan jobalar «jabyq esik» jaǵdaıynda daıyndalmaýy tıis. Qazaqta «kelisip pishken ton kelte bolmas» degen sóz bar. Sondyqtan mundaı jumystarǵa táýelsiz sarapshylar, azamattyq qoǵam ókilderi, ásirese jastardyń aralasqany jón», - dedi Maskım Spotkaı.

Ulttyq qoǵamdyq senim keńesi múshesiniń aıtýynsha ulttyq jobalar ekonomıka jáne ınfraqurylym boıynsha, sondaı-aq qorshaǵan ortany qorǵaý, jastardy qoldaý, Rýhanı jańǵyrý, ulttyq birlik, aǵartý salalaryn qamtýy tıis.

«Sonymen qatar Memleket basshysynyń «Qazaq tili – etnosaralyq qarym-qatynas tili» degen ıdeıasyn damytý úshin arnaıy joba ázirleý mańyzdy dep sanaımyz», - dedi ol.