Qazaq tili - tehnologııanyń tili emes degen stereotıpti joıý kerek – Baǵdat Mýsın

NUR-SULTAN. QazAqparat - Tsıfrlyq damý, ınnovatsııalar jáne aeroǵarysh mınıstrligi Astana Hub tehnoparkimen birge qazaq tilin damytýǵa baǵyttalǵan IT-startaptardyń Qaz Startup Battle saıysyn ótkizdi, dep habarlaıdy QazAqparat mınıstrliktiń baspasóz qyzmetine silteme jasap.

Baspasóz qyzmetiniń málimetterine qaraǵanda, QAZFORUM qazaq tilinde onlaın kontent jasaýshylardyń V forýmy aıasynda ótken battldyń jeńimpazdary 3,5 mln teńge aqshalaı grantqa ıe boldy.

Qaz Startup Battle saıysyna qatysqan 13 jas ІT-kompanııa óz ónimderin mınıstr Baǵdat Mýsın tóraǵalyq etken qazylar alqasynyń nazaryna usyndy. Sonyń ishinde qazaq tilindegi jazbasha mátindi taný baǵdarlamasy, qazaqsha onlaın-kýrstar platformasy, sheteldik shyǵarmalardyń qazaqsha aýdıonusqasynyń qosymshasy, qazaqstandyq avtorlardyń aýdıokitaptar mobıldik qosymshasy, qazaqtildi aýdıtorııaǵa aǵylshynsha úıretý servısi jáne t.b. startaptar bar.

Tehnologııalyq startaptar arasynan úzdik shyqqan jeńimpazdarǵa - Qlang marketpleıs jáne onlaın-platformasyna 2 mln teńge, Joo.kz abıtýrıentterge arnalǵan servıske 1 mln teńge, On Moms júkti áıelderge arnalǵan mobıldi qosymsha startapyna 500 myń teńge aqshalaı grant tabystaldy.

«Qazaq tili – tehnologııanyń tili emes degen» stereotıpti joıýmyz kerek. Ótken aptada biz Digital Bridge aıasynda jalpy qazaqstandyq startaptar arasynda Astana Hub Battle uıymdastyrǵan bolatynbyz. Al búgin qazaq tilin damytýǵa baǵyttalǵan startaptardy marapattadyq. Mundaı bastamalardy qoldaý asa mańyzdy»,- dedi Baǵdat Mýsın.