«Qazaq tili» qoǵamynyń Ortalyq keńesiniń jańa quramyna 47 adam saılandy
Túrkistanda ótken qoǵamnyń VI quryltaıynda Memlekettik hatshy Qyrymbek Kósherbaev QR Tuńǵysh Prezıdenti, Elbasy Nursultan Nazarbaev pen QR Prezıdenti Qasym-Jomart Toqaevtyń quryltaıǵa arnalǵan quttyqtaý hattaryn oqyp berdi. Sondaı-aq qazaq tiliniń qoldanylý aıasyn keńeıtý úshin mańyzdy jumystar jalǵasatynyn, eldi biriktiretin faktor memlekettik til ekenin atap ótti. Prezıdent ákimshiligi men el úkimeti tarapynan qazaq tiliniń mártebesin kóterýge barynsha qoldaý kórsetile beretinin málimdedi. Memlekettik til saıasatyn tıimdi iske asyrý baǵytyndaǵy josparlardy saralap, tıisti tapsyrmalar men josparlardy bekitti.
«Bul quryltaıdy Túrkistanda ótkizýimizde mán bar. Elbasynyń tarıhı sheshimimen Túrkistan oblysy qurylyp, Túrkistan qalasy oblys ortalyǵy retinde damyp keledi. Qyrýar jumys atqarylyp jatyr. Sizder – el aldynda júrgen azamatsyzdar. Elordany kórip júrsizder, bul joly Túrkistannyń jańa kelbetin kórsin, qýansyn dep quryltaıdy osynda uıymdastyrýdy jón kórdik», – dedi Q.Kósherbaev.
Keleli basqosýda «Qazaq tili» qoǵamynyń atqarǵan jumysy boıynsha Ortalyq keńesiniń esebi tyńdaldy. Qoǵam fılıaldarynyń basshylary da baıandama jasap, óz usynystaryn bildirdi. Sonymen birge qoǵamnyń jańa baǵdarlamasy men jarǵysy qabyldandy. Quryltaıda delegattardyń ashyq daýys berýi arqyly halyqaralyq «Qazaq tili» qoǵamynyń prezıdenti bolyp saılanǵan QR Parlamenti Májilisiniń depýtaty Berik Ábdiǵalıuly memlekettik tildi tuǵyryna tolyq qondyrý baǵytynda jumys kúsheıetinin jetkizdi.
«Qazaq tiliniń máselesin qazaq tildi ortada ǵana talqylaı bermeı, orys tildi ortada da talqylap, memlekettik tildiń mańyzdylyǵyn keı aǵaıyndarǵa túsindirý kerek. Qazaqstannyń árbir azamaty qazaq tilin bilýge mindetti», – dedi ol.
Quryltaı barysynda óńirlerde qoǵam fılıaldarynyń jumysy kúsheıtilip, bas keńse Almatydan Nur-Sultanǵa kóshiriletini aıtyldy. Bas uıym men fılıaldardyń jumys jospary bekitildi. Sondaı-aq jıyn barysynda «Qazaq tili» qoǵamdyq birlestiginiń Qyzylorda oblystyq fılıalynyń tóraǵasy Sádýaqas Ańsat «Parasat» ordenimen, A.Baıtursynuly atyndaǵy Til bilimi ınstıtýtynyń dırektory, ǵalym Anar Fazyljanova «Qurmet» ordenimen marapattaldy. Olardy Memlekettik hatshy Q.Kósherbaev arnaıy marapattap, qazaq tiline qosqan úlesteri úshin alǵysyn bildirdi.
Mańyzdy basqosýda QR Parlamenti Májilisiniń depýtaty Gennadıı Shıpovskıh áleýmettik jeliler men ǵalamtorda qazaqsha kontentterdi kóbeıtip, jastardyń suranysyn qanaǵattandyrý kerek degen pikirin bildirse, qoǵam qaıratkeri Orazkúl Asanǵazy men til janashyry Asyly Osman memlekettik tildi tolyq tuǵyryna qondyrýǵa keri áserin tıgizip otyrǵan faktorlarǵa toqtalyp, qazaq tiliniń bolashaǵy úshin naqty jumystar atqarylýy kerektigin jetkizdi.
Túrkistan oblysynda 2 kúnge sozylǵan quryltaıǵa qatysýshylar Arystan bab pen Qoja Ahmet ıAsaýı kesenesine zııarat jasap, babalar rýhyna taǵzym etti. Osy saparda delegattar til janashyrlary ári qoǵam qaıratkerleri Ózbekáli Jánibekov pen Ómirzaq Aıtbaevty eske aldy. Jıynǵa qatysýshylar Túrkistandaǵy oń ózgeristerge rızashylyqtaryn bildirip, quryltaıdaǵy mańyzdy bastamalardy júzege asyrýǵa bar kúshterin salatyndaryn jetkizdi.