Qazaq tarıhy batys pen shyǵysqa qatar áser etken - Rassel Baýers

NUR-SULTAN. QazAqparat - Arızona shtaty AQSh pen Qazaqstan arasyndaǵy saýda-ekonomıkalyq baılanystyń ortalyǵyna aınalady. Bul týraly Qazaqstandaǵy saýda-ınvestıtsııalyq mısıııalardyń keleshegin talqylaǵan baspasóz máslıhatynda aıtyldy, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken sharada Arızona ókilder palatasynyń spıkeri Rassel Baýers eki el arasyndaǵy ekonomıkalyq qarym-qatynastyń tarıhyna qysqasha toqtalyp, ony jandandyra túsýge nıetti ekenin bildirdi.

«Sizderdiń tarıh Batys pen Shyǵysqa qatar áser etken. Eki alyp ekonomıkanyń ortasynda tursyzdar. El tizginindegi tulǵalar sarabdal saıasat ustanyp otyr. Bizde de sizder sııaqty kóshpeli órkenıet bolǵan. Myńjyldyq tarıhymyz óte uqsas. Mádenıetterińizdi qatty qasterleısizder. Sondyqtan, sizdermen áriptestik ornatý bizge óte qolaıly», - deıdi Rassel Baýers.

Spıkerdiń aıtýynsha, Qazaqstan aeroǵarysh salasynda Baıqońyr aılaǵynyń múmkindikterin keńinen paıdalanýy qajet.

«Qazaqstan - jas ári demokratııalyq memleket. Aýyl sharýashylyǵy men aeroǵarysh salasynda múmkindikterińiz orasan ekenin bilemiz. Al bizde 926 aeroǵarysh kompanııasy bar. Bul salada Baıqońyrdyń orny erekshe. Atalmysh salada sizderge tehnologııalyq qoldaý kórsetýge ázirmiz», - dedi AQSh ókili.

Osy kelisimderdiń barlyǵyn naqtylap, qanshalyqty múmkin ekenin baǵalaý úshin mıssııa ókilderi 5-13 maýsym aralyǵynda Nur-Sultan, Shymkent, Almaty, Túrkistan jáne Óskemen qalalaryna barýdy josparlap otyr. Sapar nátıjesinde Arızona ókilder palatasy Nur-Sultan qalasynda turaqty keńsesin ashatyny da aıtyldy.