Qazaq sý sharýashylyǵy ınstıtýty salanyń bas ǵylymı-tehnıkalyq ortalyǵyna aınaldy

ASTANA. QazAqparat – Qazaq sý sharýashylyǵy ǵylymı-zertteý ınstıtýty salanyń bas ǵylymı-tehnıkalyq ortalyǵy bolyp belgilendi. Bul týraly Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Sý salasynda bilikti kadrlardyń jetispeýshiligi máselesin sheshý maqsatynda Ǵylym jáne joǵary bilim mınıstrligi M. Dýlatı atyndaǵy Taraz óńirlik ýnıversıtetin bazalyq beıindi joǵary oqý orny retinde aıqyndady. Sý resýrstaryn basqarýdaǵy ǵylymnyń rólin arttyrý máselesin sheshý úshin Sý keńesiniń otyrysynda Qazaq sý sharýashylyǵy ǵylymı-zertteý ınstıtýty sý salasynyń bas ǵylymı-tehnıkalyq ortalyǵy bolyp belgilendi», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, ınstıtýtta sý salasy boıynsha barlyq ǵylymı-zertteý jáne taldaý jumystaryn júrgizýge basym quqyq bekitiledi dep josparlanǵan.

«Atalǵan ınstıtýttyń janynan elimizdiń sý resýrstarynyń sany men sapasy týraly obektıvti jáne shynaıy aqparatty qalyptastyrý úshin Aqparattyq-taldaý ortalyǵy qurylady. Budan basqa, ol ǵylymı negizdelgen basqarý sheshimderin qabyldaý jáne memleketaralyq kelissózder júrgizý kezinde usynymdar ázirleý úshin qajetti jedel, orta merzimdi jáne uzaq merzimdi boljamdardy jasaýmen aınalysady», - dedi Serikqalı Brekeshev.