Qazaq sportshylary ótken aptada qandaı jetistikterge qol jetkizdi
Atap aıtsaq, bul kúnderi Indonezııanyń Djakarta qalasynda ótip jatqan nysana kózdeýden Azııa chempıonatynda Qazaqstan quramasynyń sportshylary Parıj Olımpıadasyna eki joldama jáne Sary qurlyq birinshiliginiń 3 altyn, 1 kúmis, 2 qola medalin jeńip aldy.
Jerlesterimizden 50 metrden 3 pozıtsııada nysana kózdeýde Aleksandra Le men jyldam oq atatyn tapanshamen 25 metrden nysana kózdeýde Nıkıta Chırıýkın Olımpıada joldamasyna qol jetkizse, N.Chırıýkın óz baǵdarlamasynda bas júlde oljalady.
Sonymen qatar vıntovkamen 50 metrden jatyp oq atýda Arına Altýhova chempıon atansa (626,8 upaı), Aleksandra Le qola júlde ıelendi (618,4 upaı). Dál osy baǵdarlamada Qazaqstan altyn júldeni qanjyǵasyna baılady. Al tapanshamen 25 metrden nysana kózdeýde Nıkıta Chırıýkın 568 upaımen úzdik úshtikti túıindep, Djakartadaǵy medal sanyn ekeýge jetkizdi. Vıntovkamen 50 metrden 3 pozıtsııada nysana kózdeýde Ulttyq qurama 2-oryn aldy. Qazir Ulttyq qurama enshisinde Olımpıadanyń 5 joldamasy bar. Olardy Islam Satpaev, Arına Altýhova, Konstantın Malınovskıı, Aleksandra Le men Nıkıta Chırıýkın jeńip aldy.
Indonezııa astanasyndaǵy Azııa chempıonaty 18 qańtarda aıaqtalady.
Qazaq jankúıerlerin eleńdetken taǵy bir doda Horvatııa astanasy Zagrebte kúres túrlerinen ótken halyqaralyq Zagreb Open reıtıngtik týrnıri boldy.
Onda jerlesterimiz bir kúmis medal jeńip aldy. Erkin kúres básekesinde beldesken Azamat Dáýletbekov (86 kg) irikteý kezeńinde úndistandyq Depak Fýnııa, ýkraınalyq Valentın Babı, grýzııalyq Evsem Shvelıdzeni, jartylaı fınalda ızraıldik Fılıp Faınsılberdi jeńgenimen, fınalda Bolgarııa balýany Magomed Ramazanovtan jeńilip, jarystyń kúmis júldegeri atandy.
Al shaıbaly hokkeıden qurlyqtyq kýbok oıyndarynda baq synaǵan elimizdiń «Nomad» komandasy halyqaralyq týrnırdiń jeńimpazy atandy. Jerlesterimiz atalǵan jarysta «Kardıff Devılz» (Ýels), «Katovıtse» (Polsha) men «Hernıng Blıý Foks» (Danıı) klýbtarymen sheberlik baıqasty.
Aıta keteıik, bul týrnırde el komandasy ekinshi ret top jaryp otyr. Buǵan deıin Kókshetaýdyń «Arlany» 2019 jyly osy jarystyń jeńimpazy atanǵan bolatyn.
Sondaı-aq, ótken aptada Paralımpıadanyń kvalıfıkatsııalyq reglamentine sáıkes K44 sanatynda 80 kg salmaq dárejesinde baq synaıtyn Nurlan Dombaev, +80 kg salmaqta Nyshan Ómiráli jáne -57 kg salmaqta Kámıla Dosmalova bıyl Parıjde ótetin Paralımpıada joldamasyna qol jetkizdi.
Sonymen birge Aýstralııanyń Ballarat qalasynda ótken velosporttan álemdik Virtus Cycling World Series 2024 dodasynda otandasymyz Dastan Ordabaı eki túrli qashyqtyqta 2 altyn medal jeńip aldy.
Aýtıstik spektr ereksheligi bar paraatlet Dastan ii-3 (zerdesi zaqymdalǵan) sanat boıynsha 18,8 km qashyqtyqtaǵy jeke ýaqytqa jarysta jáne 5,5 km qashyqtyq krıterıým básekesinde aldyna jan salmaı, bas júldeni oljalady.