Qazaq sportshylary bıyl qandaı jetistikterge qol jetkizdi
Endi, bıylǵy 2024 jyldaǵy este qalǵan baıraqty básekeler týraly qysqasha toqtalyp ótsek.
Kanvon-2024: (Ońtústik Koreıa) Olımpıadasy
Bul Olımpıada oıyndary qazaq jankúıerleri úshin tarıhı altyn medal jeńip alǵan jarqyn sátterimen máńgi este qaldy. Olaı deıtinimiz 2012 jyly Insbrýkte (Aýstrııa) ótken oıyndarda, 2012 jylǵy Insbrýk (Aýstrııa) Olımpıadasynda jáne 2020 jyly Lozanna (Shveıtsarııa) Olımpıadasynda qazaq eliniń sportshylary jeńis tuǵyrynyń eń bıik satysyna kóterilip, Ánuranymyzdy áýelete almaǵan edi. Tipti, Lozannada birde-bir júldege qol jetkize almadyq.
Al bıylǵy jyldyń basynda bastaý alǵan Kanvon-2024 jasóspirimder arasyndaǵy IV qysqy Olımpıada oıyndary bizge tarıhı jetistigimen máńgi esimizde qalyp otyr. Atalǵan dodada Qazaqstan jasóspirimder quramasy sapynda 41 sportshy 5 sport túrinen baq synap, 55 júlde jıyntyǵyn sarapqa saldy.
Nátıjesinde 1 altyn, 2 qola medalmen jalpy komandalyq esepte 20-orynǵa qol jetkizdi.
Tuńǵysh altyn medaldi shańǵymen tuǵyrdan sekirýden Qazaqstan komandasynyń múshesi Ilıa Mızernyh jeńip alsa, qola medaldiń birin short-trekten 1 000 metr qashyqtyqta synǵa túsken sportshylarymyz Polına Omelchýk qanjyǵasyna baılady. Al ekinshi qola júldeni Qazaqstan qorjynyna hokkeıshilerimiz saldy.
Parıj-2024: (Frantsııa) Olımpıadasy
Jaz ortasynan aýa búkil álem nazary Parıjdegi 4 jyldyqtyń basty dodasyna aýdy. Atalǵan basty dodany Qazaqstan quramasy jalpy esepte 43-orynmen aıaqtady.
Naqtyraq aıtsaq, Parıj Olımpıadasynda Qazaqstan quramasy 1 altyn, 3 kúmis, 3 qola medalǵa qol jetkizdi.
Altyn júldeni Olımpıadanyń alǵashqy kúni el qorjynyna dzıýdodan 60 keli salmaqta Eldos Smetov syılady. Ókinishke qaraı, ózge sportshylarymyz jeńis tuǵyrynyń eń bıik satysyna kóterile alǵan joq. Dese de, ár júldeniń orny óz erekshelikterimen este qaldy.
Al kúmis júldeni sporttyq gımnastıkadan Narıman Qurbanov, grek-rım kúresinen 77 keli salmaqta Demeý Jadyraev jáne bokstan 80 keli salmaqta el namysyn qorǵaǵan Nurbek Oraldaı jeńip aldy.
Qola medaldardy nysana kózdeýden komandalyq jarysta Islam Satpaev pen Aleksandra Le (tapanshamen 10 metrden atý), dzıýdodan 66 keli salmaqta Ǵusman Qyrǵyzbaev jáne áıelder boksynan 51 keli salmaqta el namysyn qorǵaǵan Nazym Qyzaıbaı jeńip aldy.
Eldos Smetov Parıjge deıin eki Olımpıadaǵa qatysyp, ekeýinde de júldege qol jetkizgen. Alaıda, onyń qorjynynda altyn ǵana joq-tuǵyn. Mine, bıyl úshinshi basty dodada dzıýdodan el tarıhyndaǵy alǵashqy altyn medaldi jeńip aldy. Osylaısha, Eldos Olımpıadada eń kóp júlde alǵan TOP-3 otandyq sportshynyń qataryna kirdi.
Al sporttyq gımnastıkadan Narıman Qurbanov jeńip alǵan kúmistiń de salmaǵy qazaq jankúıerleri úshin asa salmaqty boldy. Olaı deıtinimiz - Qurbanov sporttyq gımnastıkadan jazǵy oıyndarda júlde alǵan tuńǵysh qazaqstandyq sportshy atandy.
Islam Sátpaev pen Aleksandra Leniń de júldesi biz úshin asa baǵaly. Olaı deıtinimiz – bul júlde el qorjynyna tabany kúrekteı 28 jyldan keıin buıyryp otyr. Osyǵan deıin jerlesterimiz nysana kózdeýden sonaý 1996 jyly Atlanta Olımpıadasynda 2 kúmis, 1 qola júlde alǵan edi. Mine, sodan keıin bıyl alǵash ret jazǵy Olımpıada oıyndarynda 10 metrden pnevmatıkalyq vıntovkamen nysana kózdeýden aralas juptyq synda Islam Sátpaev pen Aleksandra Le 3-orynǵa ıe boldy.
Álem chempıonatyndaǵy alǵashqy altyn
Sý sporty túrlerinen Qatar astanasy Dohada ótken álem chempıonatynda Edýard Kım men Nargıza Bolatova kórkem júzýden tehnıkalyq aralas baǵdarlamada altynnan alqa taǵyp, tarıhı nátıjege qol jetkizdi. Bul - Qazaqstan atletteriniń sý sporty túrlerinen álem chempıonatynda qol jetkizgen tarıhı altyn medal retinde este qaldy.
Fýtzaldan álem chempıonyn toqtatqan ulttyq qurama
Qazaqstan quramasy álem chempıonatyndaǵy eń iri jeńisin qaıtalady. Sondaı-aq, jerlesterimiz iri týrnırlerdiń fınaldyq kezeńinde 8 jyldan beri jeńilmegen Portýgalııaǵa tosqaýyl boldy. Al Birjan Orazov Ispanııa qaqpasyna 6-sekýndta gol soǵyp, tarıhtaǵy eń jyldam goldyń avtory atandy.
Shahmat Olımpıadasyndaǵy tarıhı jetistik
Shahmattan Býdapeshtte (Majarstan) rekordtyq 169 eldiń qatysýymen ótken Olımpıadada elimizdiń áıelder quramasy óz tarıhynda alǵash ret 2-orynǵa turaqtady.
Úndistan – 19 upaı
Qazaqstan – 18 upaı
AQSh – 17 upaı
Bul dodada Bıbisara Asaýbaeva, Ksenııa Balabaeva, Ámına Qaıyrbekova birde-bir oıynda jeńilmedi.
UFC-degi Shavkat Rahmonovtiń jarqyn sáti
Bıyl 30 jastaǵy Shavkat Rahmonov jeltoqsanda bıylǵy birinshi jekpe-jegin jeńilistiń dámin tatpaǵan Ien Gerrıge qarsy ótkizip, tóreshiler sheshimimen basym tústi. Endi kelesi jyly chempıon ataǵy úshin Belal Muhammadpen kezdesedi.
Erkin kúresten erlegen jyl
Kúres túrlerinen Tıranada (Albanııa) ótken Olımpıada baǵdarlamasyna kirmeıtin salmaqtar boıynsha álem chempıonatynda 70 kelide Nurqoja Qaıpanov top jardy. Bul - erkin kúresten el tarıhyndaǵy ekinshi altyn.
Short-trekten qol jetkizgen tarıhı medal
Short-trekten Rotterdam (Nıderland) qalasynda ótken álem chempıonatynda 500 metr qashyqtyqta Denıs Nıkısha kúmis júlde aldy.
Eskekshiler de erledi
Kanoede eskek esýden Samarqan qalasynda (Ózbekstan) ótken álem chempıonatynda Marııa Brovkova 500 metrge jarysta 3-orynǵa turaqtady. Osylaısha, ol álem chempıonatynda el tarıhynda júlde enshilegen birinshi arý atandy.
Kóshpendiler oıynynda da kósh bastadyq
Tuńǵysh ret elordamyzda ótken 5-shi Dúnıejúzilik kóshpendiler oıyndary da jarqyn sátterimen este qaldy. 90-ǵa jýyq el qatysqan básekede el sportshylary 43 altyn, 32 kúmis, 37 qola (112) medalmen jalpykomandalyq esepte birinshi oryndy jeńip aldy.
Al Qyrǵyzstan quramasy 18 altyn, 21 kúmis, 25 (64) qola medal jeńip alyp, jalpy esepte ekinshi orynǵa ıe boldy.
Al úzdik úshinshi oryndy Ózbekstan quramasy qanjyǵasyna baılady. Olardyń enshisinde 11 altyn, 12 kúmis, 11 (34) qola medal bar.
Tórtinshi orynǵa 11 altyn, 10 kúmis, 25 qola medal jeńip alǵan Reseı quramasy ıelik etse, bestikti 2 altyn, 2 kúmis, 2 qola medalmen Túrkııa quramasy túıindedi.
8 qyrkúıek kúni alaýy tutanǵan dodaǵa 89 elden 2 430-ǵa jýyq sportshy qatysyp, 21 sport túrinen 97 medal jıyntyǵyn sarapqa saldy.
89 eldiń 33-i 5-shi Dúnıejúzilik kóshpendiler oıyndarynyń medaline qol jetkizdi. Onyń ishinde 18 memleket altyn júlde jeńip alsa, 16 memlekettiń qorjynynda kúmis, 28 memlekettiń qorjyny qola medal bar.
Jalpy, qazaq sportshylary bıylǵy 9 aıda otandyq sportshylar 621 medal (213 altyn, 191 kúmis jáne 217 qola) jeńip aldy.
Osyǵan deıin 2024 jyly Qazaqstan sporty qandaı jeńisterge jetti degen taqyryppen saraptamalyq materıal jarııalaǵan edik.