Qazaq sadaqshylary álem kýbogi kezeńinde aralas saıystan alǵash ret chempıon atandy

<p>ORAL. KAZINFORM — Antalıa (Túrkııa) qalasynda sadaq atýdan ótken álem kýboginiń úshinshi kezeńinde bloktyq saıys boıynsha aralas juptyq básekede Andreı Tıýtıýn men Adel Jeksenbınova chempıon atandy.</p>

Sportty damytý dırektsııasynan málim etkendeı, qazaqstandyq jup fınalda Ulybrıtanııa komandasynan aılasyn asyrdy. 

Aralas básekede barlyǵy 24 eldiń sportshylary baq synady. Italııa sadaqshylary úzdik úshtikti túıindedi.

Foto: instagram.com/qaz_team_official

Qazaqstandyqtar sońǵy básekede Ulybrıtanııadan 158:155 (39:39, 39:39, 40:38, 40:39) esebimen basym tústi. A.Tıýtıýn álemdik reıtıngide 19-ynshy, al A.Jeksenbınova 51-satyda edi. 

Al ulybrıtanııalyqtar sapyndaǵy álem kýboginiń 12 márte júldegeri, eki dúrkin Eýropa chempıony Ella Gıbson reıtıngide kósh bastasa, Edjeı Skott 75-orynda turǵan.

Osylaısha, qazaqstandyq dýet álem kýbogi kezeńinde aralas básekede alǵash ret top jardy. 

Foto: Sportty damytý dırektsııasy

Andreı Tıýtıýn men Adel Jeksenbınova juby sanaýly kún buryn ǵana Ońtústik Koreıada ótken Azııa kýbogi kezeńinde qola júldege ıe bolǵan edi.

Jalpy, Qazaqstan bloktyq sadaq atýdan óz tarıhynda álem kýbogynyń kezeńderinde ekinshi ret júlde aldy.

Foto: Sportty damytý dırektsııasy

Buǵan deıin sáýir aıynda áıelder quramasy komandalyq saıysta qola júldeger atanǵan.