Qazaq rejısseri Nano-Opera baıqaýynda jeńiske úmitkerler ondyǵyna endi

NUR-SULTAN. QazAqparat - Rejısser Erenbaq Toıkenov halyqaralyq «Nano-Opera» jas rejısserler baıqaýynyń irikteýinen ótken tarıhtaǵy alǵashqy qazaqstandyq atandy. Ol 2 júzden asa adamnyń ishinen júldeli orynǵa úmitker on qatysýshynyń qataryna kirdi, dep habarlaıdy QazAqparat.

«Nano-Opera» baıqaýy 2013 jyldan beri eki jylda bir ótedi. Joǵary kásibı qazylar alqasynyń quramynda kórkemdik jetekshiler, jetekshi halyqaralyq opera teatrlarynyń dırektorlary men rejısserleri, tanymal teatr menedjerleri men prodıýserleri bar. Eń mańyzdy marapat – baıqaýdyń bas-júldesi – «Gelıkon-operada» spektakl qoıýǵa, sondaı-aq basqa da opera teatrlarynda qoıylymǵa sertıfıkat alady.

«Mýzykalyq teatrdyń rejısserler baıqaýy - álemdik mádenı keńistiktegi óte sırek jaǵdaı, al «Nano-Opera» – álemde baǵalanatyn úsh baıqaýdyń biri. Іrikteý kezeńinen ótý úshin álemdik klassıkalyq repertýardan operalyq spektakl jaıly ózińniń kórgen-túıgenderińdi qaǵaz kúıinde usyný kerek. Meniń tańdaýym Dj.Pýchchınıdiń jaýhary «Týrandot» operasyna tústi, sebebi hıkaıanyń basty keıipkeri Kalaf – noǵaı áýletiniń ókili, al noǵaılar – Qazaqstannyń etnıkalyq toby. Buǵan deıin Germanııada Camerata Nuova baıqaýyna qatysqanymdy, sol kezde de 2 júzden astam úmitkerdiń arasynan aqtyq toǵyzdyqqa engen tarıhtaǵy tuńǵysh qazaqstandyq bolǵanymdy aıta ketkim keledi», – dedi Erenbaq Toıkenov.

Aıta keteıik, baıqaý qatysýshylary «Gelıkon-opera» teatry solısterimen birge birinshi kezeńde arııanyń, ekinshi kezeńde dýettiń, úshinshi kezeńde opera solısteri jáne hor ártisterimen kópshilik sahna qoıylymdaryn oryndaıdy. Sahnalyq nómirlerdi jasaý jurtshylyq aldynda ótedi.

Sýret: astana-akshamy.kz