«Qazaq radıosynyń» ǵasyrlyq mereıtoıyna arnalǵan merekelik kontsert ótti

NUR-SULTAN. QazAqparat - «Qazaqkontsert» memlekettik kontserttik uıymy «Qazaq radıosynyń» 100 jyldyq mereıtoıyna oraı merekelik kontsert arnady. «Qazaqstan» OKZ kameralyq zalynda ótken kontsert eki úlken uıymnyń yntymaqtastyq qarym-qatynasyn nyǵaıta tústi, dep habarlaıdy QazAqparat tilshisi.

«Qazaqkontsert» pen «Qazaq radıosy» uıymdaryn kóptegen mádenı-tanymdyq jobalar baılanystyrady. Sondaı-aq ǵasyr qurdasy atanǵan radıonyń altyn qorynda Qazaqkontsertte eńbek etken óner sańlaqtarynyń týyndylary saqtalǵan. Bıyl «Qazaqkontsert» uıymy da óziniń 60 jyldyǵyn atap ótetinin eskersek, bul qos mereıtoıǵa arnalǵan kontsert ult rýhanııatyn arttyra túskeni anyq.

Merekelik is-shara barysynda quttyqtaý sózin «Qazaqkontsert» memlekettik kontserttik uıymynyń dırektory Jeńis Seıdýllauly jetkizdi:

«Aqparattyq, tarıhı-tanymdyq, mədenı-aǵartýshylyq baǵyttaǵy ózekti týyndylar toǵysqan osyndaı irgeli uıymmen Qazaqkontserttiń yntymaqtastyq ornatýy bizdi erekshe qýantady. Qazaq mýzyka óneriniń qarashańyraǵy atanǵan Qazaqkontserttiń tarıhy «Qazaq radıosymen» tyǵyz baılanysty. Qazaqkontsertte eńbek etken óner sańlaqtarynyń týyndylary Qazaq radıosynyń tolqynynda estilgen saıyn bizdiń de tarıhymyz jańǵyra, jańara túsedi. Ǵasyr qurdasy atanǵan «Qazaq radıosy» órkendeı bersin. Shyǵarmashylyqtaryńyz tabysqa, eńbekterińiz úlken jetistikterge ulassyn! Halyq rýhanııatyn damytatyn Qazaqkontsert pen Qazaq radıosynyń birlesken jobalary kóp bolsyn!» - dedi Jeńis Seıdýllauly.

Uıymdastyrýshylardyń atap ótýinshe, kontsert barysynda barlyq sanıtarlyq talaptar saqtaldy.

Merekelik kontsertte «Astana sazy» memlekettik folklorlyq ansambli, Erbolat Shaldybekov, Klara Tólenbaeva, Aıgúl Elshibaeva, Qurmash Mahanov, Gúlnár Kóshenova syndy ártister óner kórsetti. Kontsert baǵdarlamasyna belgili halyq týyndylary men zamanaýı shyǵarmalar engen. «Qazaq radıosynyń» ujymy da ózderiniń alǵystaryn jetkizip, eki uıym arasyndaǵy seriktestik odan ári kúsheıe túsetinine senim bildirdi.