Qazaq radıosynda jańa maýsym bastaldy

NUR-SULTAN. QazAqparat - Qazaq radıolary seriktestigine qarasty radıoarnalar tyńdarmandardy jańa maýsymda tyń jobalarmen qýantpaq. Qyrkúıekten bastap Qazaq radıosy, Astana radıosy, Shalqar radıosy jáne Klassık radıosy áýe tolqynynan 30-ǵa jýyq jańa radıohabar shyǵady, dep habarlaıdy QazAqparat.

Jańa maýsymda Qazaq radıosy aqparattyq-tanymdyq baǵytqa, Shalqar radıosy ulttyq kontentke basymdyq beredi. Bul byltyr bastalǵan jumystyń jalǵasy jáne kúzgi maýsymda ashylatyn jańa habarlar osy formatqa laıyqtalyp ashylǵan. Qazaq radıosynan tyńdarmandarǵa túrli sala boıynsha keńes beretin, «qoǵam únine qulaq asatyn úkimet» tujyrymdamasyn júzege asyrýǵa baǵyttalǵan ınteraktıvti habarlar ashylady. Máselen, «Aqsha máselesi» habarynda - memlekettik turǵyn-úı baǵdarlamalarynyń tetikteri men aqshany bank depozıtterinde durys saqtaý, balanyń bilim alýyna osy bastan qarjy jınaý, qarjy pırammıdalaryna aldanýdan abaı bolý joldary tyńdarmanǵa jan-jaqty túsindiriledi. Al «Jan álemi» jańa habarynda koronavırýs pandemııasyna baılanysty nemese turmystyq problemalarmen psıhoemotsıonaldy kúızeliske túsken tyńdarmanmen psıholog maman tildesedi. Budan bólek tyńdarmandarǵa zańger men dáriger keńesi, aýyldaǵy kásibin keńeıtemin degen sharýalarǵa agrarlyq saladaǵy memlekettik qoldaý tártibin túsindiretin ınteraktıvti radıohabarlar efırge shyǵady. Altyn qordan Aıtys, áýezdi áýen, jedel jańalyq, saıası suhbat jáne jyldar boıy halyq jadynda qalǵan habarlar da jalǵasyn tabady.

Al Shalqar radıoarnasynan qyrkúıek aıynda ulttyq rýhanııat baǵytyndaǵy jańa 12 joba áýe tolqynyna shyǵady. Onyń ishinde Abaı Qunanbaıuylynyń 175 jyldyǵyna arnalǵan «Abaı ulaǵaty», Ál-Farabıdiń 1150 jyldyq mereıtoıy qarsańynda traktattary negizinde ázirlengen aýdıorolıkter, teatr óneri jaıly «Sahna», mýzeıler men qolóner týraly «Jádiger», halyq mýzykasyna arnalǵan «Án shashý» radıohabarlary bar.

Jańa maýsymnyń taǵy bir jańalyǵy Qazaq radıosy men «Shalqar» radıosy efırge jańa aýdıobezendirýmen shyǵady. Ár radıoarnanyń tek ózine táne ereksheligi bolyp sanalatyn efırdegi djıngldar men saǵat basynda soǵatyn aýdıorolıkter tól týyndy retinde qaıta jasalǵan.

Mysaly, Qazaq radıosynyń efıri belgili kompozıtor, «Balalyq shaǵymnyń aspany», «Abaı», «Mustafa Shoqaı», «Ábilqaıyr», «Aldar Kóse», «Shal» sekildi úzdik kınofılmderi saýndtreginiń avtory, fılosofııa-psıhologııalyq baǵytta erekshe melodııalyq stıli bar Qýat Shildebaevtyń týyndylarymen bezendirildi.

Al Shalqar radıosynyń efırin belgili sazger Halyq Rızabek jetigen, syrnaı, qobyz sekildi ulttyq aspaptar arqyly jazyp alynǵan eksklıýzıvti aýdıorolıktermen ásemdedi.

Astana jáne Klassık radıoarnalary da kúzgi maýsyda óz tyńdarmandaryna Elorda ómirine qatysty jańa jobalar men akademııalyq mýzykaǵa qatysty, Abaıdyń án murasyna qatysty radıohabarlardy áýe tolqynyna shyǵarady.

Jańa maýsym qarsańynda stýdııadaǵy mıkrofondar men dıktofondar da alǵash ret radıo stılinde bezendirildi. Sondaı-aq Qazaq radıosynyń Almaty stýdııasy beınekameralarmen jabdyqtalady. Bul stýdııadan tikeleı efırde shyǵatyn habarlardy radıonyń áleýmettik jelidegi paraqshalarynan kórsetýge múmkindik beredi.