Qazaq pen túrik halqynyń dostyǵyn tereńdetý basty maqsatymyz - Elbasy
«Eki halyqtyń, qazaq pen túrik halqynyń dostyǵyn, baılanysyn tereńdetý bizdiń basty maqsatymyz. Saýda-ekonomıkalyq jáne ınvestıtsııalyq qatynastardy talqylap, birqatar ýaǵdalastyqqa qol jetkizdik. Ony qol qoıǵan qujattardan kórdińizder. Qazaqstanda kóptegen túrik kompanııalary tabysty jumys isteıdi. Qazir elimizde túrik kapıtalynyń qatysýymen qurylǵan 1800-den astam kásiporyn jumys istep tur. Taýar aınalymynyń kólemi ótken jyly 2 mlrd dollarǵa jaqyn boldy. Bul kórsetkishti búgin bizdiń keliskenimiz boıynsha jaqyn arada 5 mlrd dollarǵa, keleshekte 10 mlrd dollarǵa jetkizý jóninde aldymyzǵa maqsat qoıdyq», - dedi Elbasy.
Nursultan Nazarbaev eki eldiń Úkimeti osy salada jumys isteıtindigin basa aıtty.
«Byltyr Rejep Taııp Erdoǵan myrzanyń Astanaǵa resmı sapary barysynda «Jańa sınergııa» atty birlesken ekonomıkalyq baǵdarlamany júzege asyrýdyń 2017-2020 jyldarǵa arnalǵan is-sharalar josparynyń hattamasyna qol qoıǵanbyz. Osy qujatqa sáıkes oryndalyp jatqan nemese josparlanǵan 24 ınvestıtsııalyq joba bar. Atalǵan jobalardyń jalpy quny 8 mlrd dollardan asady», - dedi Memleket basshysy.
Qazaqstan Prezıdenti búgin túrik kompanııalarynyń basshylarymen kezdeskenin, olarmen saýda-ınvestıtsııalyq yntymaqtastyǵynyń jaı-kúıi men perspektıvasy jóninde pikir almasqanyn basa aıtty.
«Kóp bıznes basshylarmen men ózim jeke kezdesip, olardyń oı-pikirlerin tyńdadym. Jalpy eki eldiń bir-birine ınvestıtsııa salýǵa, yntymaqtasa jumys isteýge yntaly ekenin kórdim. Saparym barysynda quny 2 mlrd dollarǵa jaqyn bolatyn kommertsııalyq jobalarǵa qatysty kelisimderge is adamdary qol qoıdy. Aldaǵy ýaqytta osy ýaǵdalastyqty birlese júzege asyrý úshin kúsh jumyldyrýymyz kerek», - dedi Nursultan Nazarbaev