Qazaq pen qytaı ýnıversıteti birlesip ǵaryshqa mıkrospýtnık ushyrmaq

<p>ASTANA. KAZINFORM — Ál-Farabı atyndaǵy Qazaq ulttyq ýnıversıteti men Qytaı Halyq Respýblıkasynyń Soltústik-Batys polıtehnıkalyq ýnıversıteti mıkrospýtnık arqyly ǵylymı zertteý júrgizý boıynsha kelisimge keldi.</p>

Bul týraly Ál-Farabı atyndaǵy Qazaq ulttyq ýnıversıtettiń rektory Janseıit Túımebaev málim etti. 

JOO basshysynyń aıtýynsha, atalǵan kelisimge Memleket basshysy Qasym-Jomart Toqaev pen Qazaqstanǵa resmı saparmen kelgen QHR Tóraǵasy Sı Tszınpınniń birlesken málimdeme jasaý barysynda qol jetken. 

«Ortaq jumys óz kezeginde ǵaryshty zertteýge, bilikti mamandardy daıarlaýǵa jáne ortaq spýtnıkterdi ázirleýge jol ashady. Sonymen qatar mıkrospýtnık arqyly jerdi qashyqtyqtan zertteý jumystaryn júrgizýge mol múmkindik beredi», — dedi Janseıit Túımebaev elordada ShYU múshe elder ókilderiniń qatysýymen ótken «Joǵary bilim berý jáne óndiristi ıntegratsııalaý salasyndaǵy yntymaqtastyq» atty halyqaralyq sımpozıýmda. 

Foto: Soltan Jeksenbekov/Kazinform

QazUÝ baspasóz qyzmetiniń málimetinshe, Qytaıdyń Soltústik-Batys polıtehnıkalyq ýnıversıteti ǵaryshqa nanospýtnıkterdi ushyrý boıynsha kóshbasshy oqý orny. 

Jobanyń maqsaty — jer qyrtysy men mantııadaǵy tyǵyzdyq geterogendiligin anyqtaý úshin spýtnıktiń arnaıy jer stantsııasy men taratqyshty qamtıtyn gravımetrııalyq ólsheý jabdyqtaryn ázirleý.

Bul jumys úlken tereńdiktegi geodınamıkalyq protsesterdi zertteýdiń negizgi mindetterin sheshýge arnalǵan. 

Sonymen qatar qos ýnıversıtet birlesip jasaǵan mıkrospýtnıkti Shanhaı yntymaqtastyq uıymy jarııalaǵan ekologııa jyly aıasynda jáne QazUÝ-dyń 90 jyldyǵy qarsańynda ǵaryshqa ushyrý josparlanyp otyr. 

«Jyldan jylǵa ShYU-ǵa múshe elder arasynda barlyq sala boıynsha yntymaqtastyq artyp keledi. Bul turǵyda ýnıversıtetter bilikti mamandardy daıarlaýda sheshýshi ról atqarady. Qazir ǵylymı zertteý júrgizý, halyqaralyq deńgeıde bilim berý jáne iskerlik baılanysty damytýdyń mańyzy orasan zor. Ál-Farabı atyndaǵy QazUÝ qazaqstandyq joǵary oqý oryndarynyń arasynda alǵashqylardyń biri bolyp ShYU-ǵa múshe memleketterdiń joǵary oqý oryndary men ShYU ýnıversıtetiniń hartııasy arasyndaǵy yntymaqtastyq týraly memorandýmǵa qol qoıdy. Maqsat — álemdik bilim keńistigine yqpaldasý jáne otandyq joǵary bilimniń básekege qabiletin arttyrý», — dep tolyqtyrdy Janseıit Túımebaev. 

Aıta keteıik, ShYU elderi birlesken qarjylandyrý arqyly ǵylymı granttar baǵdarlamasyn iske qospaq.