Qazaq-ózbek ýnıversıtetteri jelilik seriktestik qurýǵa ýaǵdalasty

NUR-SULTAN. QazAqparat - QR Mádenıet jáne sport mınıstri Aqtoty Raıymqulova Ózbekstan astanasy Tashkent qalasynda Ózbekstan Respýblıkasynyń vıtse-premeri Azız Abdýhakımovpen kezdesti, dep habarlaıdy QazAqparat tilshisi.

Mádenıet mınıstrliginiń málimetinshe, kezdesý barysynda ózbek-qazaq qarym-qatynasynyń mańyzdy bóligi týrızm salasyn birlesip damytý týraly ortaq máseleler talqylandy. Basqosý aıasynda Ózbekstan Respýblıkasynyń «Jibek joly» halyqaralyq ýnıversıteti men Qazaqstan Respýblıkasynyń «Týrızm jáne qonaqjaılyq» halyqaralyq ýnıversıteti arasyndaǵy jelilik seriktestik qurý týraly memorandýmǵa qol qoıyldy.

Memorandýmnyń maqsaty - ýaǵdalastyq sheńberinde taraptardyń arasynda jelilik seriktestik qurý, uzaq merzimdi, tıimdi jáne ózara paıdaly yntymaqtastyqty damytý, sondaı-aq eki eldiń týrızm salasynyń damýy úshin aqparattyq orta qalyptastyrý.

Sondaı- aq, búgin Aqtoty Raıymqulova «Amırsoı» taý shańǵy kýrortynyń ashylý saltanatyna da qatysty.