Qazaq-ózbek shekarasynda «Ortalyq Azııa» ónerkásiptik kooperatsııa ortalyǵy qurylady

ASTANA. QazAqparat – Qazirgi tańda Ózbekstanmen aradaǵy shekarada «Ortalyq Azııa» halyqaralyq ónerkásiptik kooperatsııa ortalyǵy qurylyp jatyr. Saýda jáne ıntegratsııa mınıstrliginiń keńeıtilgen alqa otyrysynda vedomstvo basshysy Serik Jumanǵarın osylaı málimdedi, dep habarlaıdy «QazAqparat» tilshisi.

«Shekara mańyndaǵy saýda, kólik, logıstıka jáne ónerkásiptik kooperatsııa ortalyqtarynyń jelilerin ashý boıynsha jumystar júrgizilip jatyr. Qazirgi tańda Ózbekstanmen aradaǵy shekarada «Ortalyq Azııa» halyqaralyq ónerkásiptik kooperatsııa ortalyǵyn qurý bastaldy. Jol kartasy bekitildi, ortalyqtyń ornalasatyn jeri anyqtaldy jáne jobanyń tehnıkalyq-ekonomıkalyq negizdemesi ázirlendi. Oǵan jumsalatyn qarajat Ózbekstan aýmaǵyndaǵy bóligi úshin shamamen – 45 mln dollar, al Qazaqstan aýmaǵynda – shamamen 100 mln dollar», - dep málim etti Saýda jáne ıntegratsııa mınıstri Serik Jumanǵarın.

Sonymen qatar, mınıstr alqa otrysynda byltyrǵy jyldyń 10 aıynda Qazaqstannyń syrtqy taýar aınalymy 34,1 paıyzǵa óskenin atap ótti.