Qazaq-ózbek shekarasynda aıaq kıim maılaıtyn kremniń ishine 775 keli geroın salyp alǵan kólik ustaldy
08:30, 02 Tamyz 2024
<p>ASTANA. KAZINFORM — Iri partııadaǵy esirtki kontrabandasy arnasynyń joly kesildi. Bul jaıynda Ulttyq qaýipsizdik komıtetiniń baspasóz qyzmetinen habarlandy. </p>
UQK shekara qyzmeti esirtkiniń rekordtyq partııasyn shekara arqyly alyp ótip bara jatqanda ustady.
Túrkistan oblysyndaǵy B.Qonysbaev atyndaǵy baqylaý-ótkizý pýnktinde shekarashylar ıisshil ıtti paıdalana otyryp, aýyr júk kóliginde aıaq kıim kremine arnalǵan ydystarǵa jasyrylǵan kúdikti zattardy taýyp, tárkiledi.
Saraptama zattardyń quramynda geroın baryn kórsetti, onyń jalpy salmaǵy — 775 kg.
Tabylǵan esirtkiniń «qara» naryqtaǵy quny — 15 mln AQSh dollarynan asady.
Osy qylmysty jasady degen kúdikpen eki shetel azamaty ustaldy jáne sot sanktsııasymen qamaýǵa alyndy.
Sotqa deıingi tergeý júrip jatyr.