Qazaq otbasyna kelin bolǵan soń, salt-dástúrdi saqtaımyn – Irına Sılchenko

AQTAÝ. QazAqparat – Mańǵystaý oblysynyń týmasy Irına Sılchenkonyń ulty orys, degenmen qazaq tilin jaqsy meńgergen jáne qazaq jigitine turmysqa shyqqan. Búginde ol ustazdyq etip, óskeleń urpaqqa orys tili men ádebıeti pánin úıretedi. Irına QazAqparat tilshisine suhbat barysynda qazaq tilin úırenýdiń qarapaıym tásilderi týraly aıtyp berdi.

«Men Mańǵystaý oblysy Beıneý aýdanynda dúnıege keldim. Ultym orys, ıaǵnı ákem – orys, anam – qazaq. Jasym – 24-te. Beıneý orta mektebin bitirip, osyndaǵy ekonomıkalyq-gýmanıtarlyq kolledjine tústim. Sodan soń Taraz memlekettik ýnıversıtetinde joǵary bilim aldym. Mamandyǵym orys tili men ádebıeti pániniń muǵalimi. Qazirgi tańda Aqtaý qalasyndaǵy №20 orta mektepte qazaq synyptary úshin orys tili men ádebıeti páninen sabaq beremin. Ustazdyq jolda júrgenime 6-shy jylǵa qarap barady. Mektepte oryssha oqydym, odan keıingi bilimdi qazaq tilinde aldym. Ósken ortam qazaqı bolǵandyqtan, qazaq tilin bala kúnimnen erkin bilemin. Onyń ústine qazaq jigitine turmysqa shyqqanmyn, qazir bir balamyz bar», - dedi Irına Sılchenko.

Sondaı-aq jas maman qazaq tilin úırengisi keletin jandarǵa keńesin usyndy.

«Menimen kóp adamdar aldymen oryssha sóılep bastaıdy. Men qazaqsha jaýap bergen soń, tańǵalyp, áńgimeni qazaq tilinde jalǵastyryp jatady. Jalpy til úırenýde, onyń ishinde qazaq tiline de qatysty bastysy, nıet bolý kerek, tildi júrektiń qalaýymen úırený qajet. Al búginde tildi úırenýdiń ádis-tásili jetip jatyr. Neshetúrli kýrstar bar, qazaqı ortamen aralasý arqyly, fılm qarap, qazaqsha áýen tyńdaý arqyly, sondaı-aq kitap oqý arqyly da úırenýge bolady», - deıdi ol.

Odan bólek, aqtaýlyq Irına Sılchenko oblystyq «Til tatýlyq tiregi» jáne respýblıkalyq «Til parasat» baıqaýlarynyń jeńimpazy.

«Qazaq tilin bilýimniń arqasynda biraz jerlerge shaqyrtý alyp, is-sharalarǵa qatysyp júrmin. Sondaı-aq BAQ tarapynan da qyzyǵýshylyq basym, suhbat alyp, túrli telebaǵdarlamalarǵa shaqyryp jatady. Sol sııaqty «Men qazaqsha sóıleımin» respýblıkalyq aktsııaǵa qatysyp, 200 adamnyń ishinen 15 úzdik qatysýshynyń biri atandym», - deıdi jas maman.

Onyń aıtýynsha, kelin bolyp túskende qazaqtyń salt-dástúrin úırený qıyndyqqa túspegen.

«Árıne, qazaq otbasyna kelin bolǵan soń, salt-dástúrdi bilemin jáne saqtaımyn. Ol jaǵynan esh qıyndyq bolǵan joq. Onyń ústine óz anam qazaq, ol da bar bilgenin úıretti. Bala kúnimnen qazaqtyń talaı toı-dýmanyna baryp júrmin, ıaǵnı kórip, bilim óskenmin», - dedi aqtaýlyq jerlesimiz.