Qazaq otbasylary fılıppındik bala kútýshilerge ne úshin qyzyǵady

<p>ASTANA. KAZINFORM &mdash; Keıingi jyldary elimizde balasyna shetelden tárbıeshi jaldaıtyn ata-analar kóbeıdi. Ásirese, Taıland pen fılıppındik kútýshilerge suranys joǵary. Tipti, qazir osy elderden kelgenderdi iriktep, arnaıy oqýdan ótkizetin agenttikter qurylǵan.</p>

Onda balany mektepke aparyp, úıirmelerge tasıtyn kútýshilerden bastap til úıretip, sabaq oqytatyn tárbıeshilerge deıin tabýǵa bolady. Jibek joly arnasynyń tilshisi Janel Nurbolat osyndaı tárbıeshilerdiń birimen tildesti.

Fılıppındik Sherıl Bandıannyń Qazaqastanǵa kelgenine bir aı bolǵan. Buǵan deıin Kýveıtte bala kútýshi bolǵan ol endi qazaq otbasynda jumys isteıdi. 4 jasar Álıhandy balabaqshaǵa alyp barady, tamaǵyn ázirleıdi. Logıkalyq oılaýdy damytatyn oıyndardy oınatyp, til úıretýge de kóńil bóledi.

«Óz elimde saýda úıinde satýshy boldym. Tańnan keshke deıin tynbaı jumys istep 100 dollar ǵana tabatynmyn. Sol kezderi Kýveıtte bala kútýshisi bolyp jumys isteıtin qurbylarym aıyna 400 dollar alatynyn aıtqan. Ózim bala baqqandy jaqsy kóremin. Aqysy da jaqsy eken. Nege kórmeske dedim», — deıdi Sherıl Bandıan.

Álıhannyń anasy Jibek balasynyń az ýaqytta Sherılge baýyr basyp qalǵanyn aıtady. Joldasy ekeýi kúni boıy jumysta. Úı tirliginiń bárin Sherıl atqarady. Al oǵan deıin bala kútýshi men aspazdy bólek jaldap, eki ese kóp aqy tólegen.

«Balaǵa qaraıdy, úı sharýasynyń bárin jasaıdy. Tamaq pisirip qoıady keshke jumystan kelgende. Mysaly, biz aspaz ben bala kútýshini jaldasaq, tek bala kútýshige 300-400 myń teńge ketedi. Al Fılıppın basa kútýshisi 450 myń alady. Biraq sonyń ishine bári kiredi. Úı jınaý, tamaq pisirý, bala tárbıesi sekildi mindetter», — deıdi Jibek Qusaıynova.

Jibek Sherıldi agenttik arqyly tapqan. Qazir onda 100-den astam fılıppındik bala kútýshisi jumys isteıdi.

Agenttiktiń negizin qalaýshy Svetlana Gramstyń aıtýynsha, shetelden kelgen tárbıeshilerge Qazaqstannan jumys birden tabylady. Óıtkeni, balasynyń jastaıynan birneshe tildi teń meńgergenin qalaıtyn ata-analar kóp.

«Bizge estrada juldyzdary men blogerler jıi keledi. Fılıppındik tárbıeshilerdiń qazaq, orys tilin bilmeıtini olar úshin taǵy bir artyqshylyq. ıAǵnı, sheteldikterdi jumysqa alý arqyly elge belgili azamattar jeke ómirlerin qupııa saqtaı alady. Biraq, bul sheteldik tárbıeshilerdi aýqatty otbasylar ǵana jaldaıdy degen sóz emes. Bizdiń kómekke júginetinderdiń arasynda qarapaıym azamattar da kóp», — deıdi Svetlana.

Svetlana bala kútýshiler agenttigin osydan 10 jyl buryn ashqan. Sol ýaqytta jumysty birneshe ǵana fılıppındik qyz-kelinshekpen bastaǵan. Keıin olar jerlesterine Qazaqstanda Fılpııpınge qaraǵanda 5 ese kóp eńbekaqy tóleıtinin aıtyp, qatarlary kóbeıgen soń, iri agenttik qurǵan.

«Fılıppındik bala kútýshilerge 800-1200 dollar aralyǵynda tóleımiz. Olarǵa qoıylatyn basty talap — kemi 3 jyldyq eńbek ótiliniń bolýy. Sondaı-aq, jasy 50 den aspaýy kerek», — dep tolyqtyrdy agenttik ıesi.

Qazir elimizde Svetlananyń ortalyǵynan basqa fılıppındikter men taılandtyqtarǵa qazaq otbasynan jumys tabatyn 4 agenttik bar. Árqaısynda 50-den astam tárbıeshi tirkelgen. Al jalpy, Qazaqstanda 192 fılıppın jáne 336 taıland azamaty eńbek etip júr. Kóbisi qurylys jáne ІT salalarynda jumys isteıdi.