Qazaq onkologııa jáne radıologııa ǴZI basshysy taǵaıyndaldy

ALMATY. QazAqparat - QR densaýlyq saqtaý jáne áleýmettik damý mınıstri Tamara Dúısenovanyń ókimimen Qazaq onkologııa jáne radıologııa ǵylymı-zertteý ınstıtýtynyń dırektory qyzmetine Dılıara Radıkqyzy Qaıdarova taǵaıyndaldy, ol buǵan deıin «Almaty onkologııa ortalyǵy» sharýashylyq júrgizý quqyǵyndaǵy memlekettik kommýnaldyq kásiporyndy basqarǵan bolatyn.

Jańa basshyny ınstıtýt ujymyna Qazaqstan Respýblıkasy densaýlyq saqtaý jáne áleýmettik damý vıtse-mınıstri Alekseı Tsoı tanystyrdy. Bul týraly «Almaty onkologııa ortalyǵynyń» baspasóz qyzmeti habarlady.

Medıtsına ǵylymdarynyń doktory, joǵary sanatty onkolog-dáriger, QR UǴA korrespondent-múshesi, Eýropalyq jatyr moıny isigine qarsy kúres jónindegi qaýymdastyǵynyń múshesi jáne Halyqaralyq qaterli isikpen kúres odaǵynyń múshesi, Eýrazııalyq onkologııa federatsııasynyń múshesi jáne basqa da kóptegen halyqaralyq uıymdardyń múshe bolyp otyrǵan Dılıara Radıkqyzy Qaıdarova 2006 jyldan Almaty onkologııa ortalyǵyn basqardy.

Qazaq onkologııa jáne radıologııa ǴZI - Qazaqstan Respýblıkasyndaǵy onkologııalyq aýrýlarǵa dıagnostıkalyq jáne emdik kómek kórsetetin jetekshi ortalyq, sondaı-aq onkologııa kadrlaryn daıarlaý jáne qaıta daıarlaý jónindegi klınıkalyq baza.