Qazaq mádenıetiniń ańyzy: Dımash Qudaıbergen Bıbigúl Tólegenovany mereıtoıymen quttyqtady
Ánshi áleýmettik jelidegi paraqshasynda jazba jarııalady. Bıbigúl Tólegenova qazaqtyń mýzyka mádenıetine úlken úles qosyp jatqan ańyz adam ekenin, onyń bulbul úni Qazaqstannyń ǵana emes, shetel kórermenderiniń de júregin jaýlap alǵanyn atap ótti.
- Qurmetti dostar! Búgin biz Qazaqstannyń rýhanı áleminiń sımvoly bolyp tabylatyn qazaq mádenıetiniń naǵyz ańyz adamy, áıgili Bıbigúl Tólegenovanyń 95 jyldyq mereıtoıyn atap ótýdemiz.
Bıbigúl Ahmetqyzy – KSRO-nyń halyq ártisi, Qazaq KSR-nyń halyq ártisi, Sotsıalıstik Eńbek Eri. Ol bar ómirin ónerge arnap, 20-ǵasyrdaǵy iri opera ánshileriniń birine aınaldy. Onyń bulbul úni Qazaqstannyń ǵana emes, shetel kórermenderiniń de júregin jaýlap aldy. Bıbigúl Ahmetqyzy uzaq jyldar boıyna jańa býyn mýzykanttaryna bilim berip, qazaqtyń mýzyka mádenıetine úlken úlesin qosyp, jas urpaqty shabyttandyrýyn jalǵastyrýda. Men osy uly mádenıettiń bir ókili bolǵanyma maqtanamyn. Bıbigúl Ahmetqyzy sııaqty sheberler salǵan mádenı joldy jalǵastyrý múmkindigine ıe bolǵanyma rızamyn. Ánderińiz máńgilik shyrqalsyn! Týǵan kúnińizben! – dep jazdy Dımash Qudaıbergen.
Aıta keteıik, búgin qazaqtyń kúmis kómeı ánshisi Bıbigúl Tólegenova 95 jasqa tolyp otyr. Mereıtoı aldynda ánshiniń ózimen suhbat qurýdyń sáti túsken bolatyn. Bıbigúl Tólegenova Dımashtyń jasy kishi bolǵanymen joly úlken ekenin aıtty.