Qazaq-qytaı shekarasynda 27 mln teńgeniń deklaratsııalanbaǵan taýaryn ákele jatqandar ustaldy

NUR-SULTAN. QazAqparat - Qazaqstandyq kásipkerler Qytaıdan quny 27 mln teńge bolatyn deklaratsııalanbaǵan taýardy kedendik baj tólemeı ákelýge tyrysqan, dep habarlaıdy QazAqparat.

Jalpy quny 27 mln teńge bolatyn avtobólshekter, akkýmýlıatorlar, dánekerleý apparaty men sharýashylyq taýarlaryn Qazaqstanǵa bir JShS kedendik tólemder men salyqty tólemeı ákelýge tyrysty.

14 maýsymda «Qaljat» keden beketinde deklaratsııalanbaǵan júkti tasymaldaý áreketi toqtatyldy. Bul týraly Memlekettik kirister komıteti habarlady.

Buzýshylyq syrtqy ekonomıkalyq qyzmetke qatysýshymen EAEO kedendik shekarasy arqyly ótkiziletin taýarlar men kólik quraldaryna kedendik baqylaý júrgizý kezinde anyqtaldy.

Tirkemesi bar KamAZ markaly avtokólik quralyn ınspektsııalyq tekserý keshenin qoldaný arqyly skanerleý nátıjeleri boıynsha qujattarda málimdelgen taýarlar men kólik quralyndaǵy zattar arasynda aıyrmashylyqtar anyqtaldy.

Kedendik tekserip qaraý nátıjeleri boıynsha jalpy salmaǵy 20 tonna deklaratsııalanbaǵan taýar anyqtaldy, olarǵa 5,5 mln teńge somasynda kedendik tólem men salyq salyndy.

Sonymen qatar, ımporttaýshy QR «Ákimshilik quqyq buzýshylyq týraly» Kodeksiniń 551-babynyń 1-bóligine sáıkes ákimshilik jaýapkershilikke tartyldy.

Deklaratsııalanbaǵan taýarlar boıynsha kedendik tólem men salyq somasy bıýdjetke óndirip alyndy.

Aıta ketý kerek, mundaı faktiler osyǵan deıin de bolǵan.

Máselen, ınspektsııalyq-tekserý keshenderin paıdalaný kezinde aǵymdaǵy jyly quny 1 mlrd teńge bolatyn 4 myń tonnadan astam deklaratsııalanbaǵan taýar anyqtaldy.

Foto: gov.kz